Prishtinë, 14 prill 2023
I nderuar Kryeministër në detyrë i Malit të Zi, zotëri Dritan Abazoviq,
Të nderuara media,
Të dashur qytetarë,
Sot pata kënaqësinë të mirëpres në takim Kryeministrin në detyrë të Malit të Zi së bashku me delegacionin e tij me përbërje prej ministrash e kryetarë të komunave me të cilët biseduam për marrëdhëniet e mira fqinjësore mes dy shteteve tona. Mundësitë e rritjes së bashkëpunimit në fushën e ekonomisë dhe investimet në infrastrukturë të përbashkët që e rritë mobilitetin dhe hap mundësitë e zhvillimit për të dy vendet tona ishin në fokus të këtij bashkëpunimi.
Mali i Zi e njohu pavarësinë e Kosovës që në vitin e shpalljes në 2008-ën, dhe sot punojmë ngushtë si dy shtete fqinje për të promovuar paqen, sigurinë dhe prosperitetin në rajonin tonë. Përtej marrëdhënie të mira ndërshtetërore kemi ndërtuar edhe raporte të mira ndërnjerëzore.
Jemi mirënjohës që në kohërat më të vështira, Mali i Zi u bë strehë shpëtimi për mbi 100 mijë qytetarë të Kosovës që u dëbuan nga fushata e gjenocidit dhe spastrimit etnik nga regjimi i Millosheviqit gjatë vitit 1998-1999. Qytete të shumta si Rozhaja, Ulqini, Plava e Gucia, i hapën dyert dhe zemrat e u përkujdesen duke i strehuar në shtëpitë e tyre e në tendat të cilët u ngritën atje, refugjatët nga Kosova. Shteti dhe qytetarët e Kosovës janë mirënjohës dhe nuk do të harrojmë asnjëherë mikpritjen dhe solidaritetin.
Sot, qytetarët e Kosovës janë jo vetëm pushues e vizitorë në bregdetin e qyteteve të Malit të Zi por edhe investitorë të rëndësishëm të cilët i kontribuojnë ndërlidhjes ekonomike mes dy vendeve tona.
Në vitin e fundit kemi rritje të shkëmbimit tregtar me Malin e Zi. Krahasuar me vitin 2021 në vitin 2022, eksportet e Kosovës në Mal të Zi janë rritur për 55%. Gjatë vitit 2022 mbi gjysmë milion hyrje-dalje të qytetarëve janë regjistruar në pikat kufitare me Malin e Zi. Natyrisht, pa llogaritur këtu hyrjet përmes Shqipërisë, ku dihet që një pjesë e mirë e qytetarëve para se të vijnë në Mal të Zi kalojnë nëpër Shqipëri.
Biseduam edhe për bashkëpunimin rajonal, rëndësinë që ky bashkëpunim ka për integrimin e ekonomive tona, afrimin e qytetarëve dhe përshpejtimin e integrimit në Bashkimin Evropian.
Na gëzon fakti që Mali i Zi ka ratifikuar tri marrëveshjet e mobilitetit në Tregun e Përbashkët Rajonal në kuadër të Procesit të Berlinit.
Rregullat e Bashkimit Evropian, avancimi i demokracisë e i sundimit të ligjit dhe forcimi i aleancës trans-atlantike janë qëndrim, qëllim e përkushtim i Republikës së Kosovës në bashkëpunimin rajonal.
Biseduam për projektet e përbashkëta sikurse:
– Lehtësimi i kalimit në pikat kufitare te qytetarëve të Republikës së Kosovës gjatë sezonit turistik;
– Finalizimin e protokollit për qarkullimin e transportit të mallrave dhe të qytetarëve, si dhe;
– Dinamizmin e zbatimit të marrëveshjes së bashkëpunimit për ndërtimin e rrugëve Deçan-Plavë dhe Pejë-Rozhajë.
E rëndësisë së veçantë sot natyrisht është nënshkrimi i Marrëveshjes për Shërbime Ajrore në mes të Qeverisë së Republikës së Kosovës dhe Qeverisë së Malit të Zi. Ky është një hap sa i rëndësishëm, po aq i domosdoshëm për rregullimin e hapësirës ajrore në mes dy Republikave tona.
Marrëveshja që nënshkruam sot ofron mundësi të reja të zhvillimit të Aviacionit Civil, mundëson shkurtimin e rrugëve ajrore e të kohës së fluturimit për 15 minuta. Një kompani ajrore që ka fluturuar katër herë në ditë, me këtë marrëveshje lehtësisht mund të shtojë edhe një fluturim. Pastaj, zvogëlon emetimin e gazrave të dëmshme si dhe ulë koston e fluturimeve të cilat ndikojnë në çmim të biletave për udhëtarët.
Deri më tani korridoret hyrëse dhe dalëse ekzistuese ndërmjet Malit të Zi dhe Kosovës shfrytëzoheshin vetëm për fluturimet ushtarake të NATO-s, derisa fluturimet komerciale nuk mund të realizoheshin. Si dy shtete nënshkruese të marrëveshjes për Hapësirën e Përbashkët Evropiane të Aviacionit – HPEA, me marrëveshjen që nënshkruam sot hapet mundësia për shfrytëzimin e lirive të fluturimeve për kompanitë ajrore. Andaj, nga këtu urime të gjithë qytetarëve të të dy shteteve tona!
Kjo marrëveshje është gjithashtu në punën e vazhdueshme të institucioneve tona për normalizimin dhe ushtrimin e sovranitetit të plotë ajror mbi territorin e Republikës së Kosovës.
Ju faleminderit, e tash kam nderin dhe kënaqësinë që t’ia kalojë fjalën kryeministrit Dritan.
