Gani I. Mehmeti
- Petar Stano tha se takimi nuk dha rezultat për shkak se palët nuk janë të gatshme të kapërcejnë dallimet e tyre dhe shtoi se BE nuk mund të sjellë sukses nëse palët s’duan.
E, po, a e kupton Stano rolin e ndërmjetësuesit? Çka do të thotë kur dikush ndërmjetëson mes dy a më shumë vetash për ndonjë mosmarrëveshje?
Mosmarrëvbeshjet janë pse njëri nga ta kërkon prej tjetrit çka nuk i takon, diçka që nuk është e tija, siç po kërkon Serbia prej Kosovës territorin e veriut të saj. Prandaj, këtu duhet të ndërhyjë ndërmjetësuesi e t’i tregojë shkurt se çka është e tij e çka nuk është e tij. Kjo është një punë shumë e lehtë, por kërkohet të jenë të drejtë dhe të ndërhyjnë. Kosova nuk është duke kërkuar asgjë nga Serbia, ama hiç fare. Serbia që po kërkon edhe asociacion për serbët në Kosovë, në mënyrë që të jetë një lloj shteti brenda shtetit, përse nuk e bën edhe për shqiptarët brenda Serbisë? Përse edhe vetë ndërmjetësuesit nuk ia kërkojnë këtë Serbisë, ashtu siç po e kërkojnë nga Kosova?
“BE-ja është lehtësues, bazuar në dëshirat e shprehura nga të dyja palët dhe miratuar nga e gjithë BE-ja. Ne po lehtësojmë që palët të kapërcejnë dallimet e tyre. Por, ne nuk do të jemi të suksesshëm kurrë nëse palët refuzojnë që të shkojnë në rrugën e kompromisit”. – vazhdon Stano.
Këso fare si thotë këtu Stano, nuk lehtësohet dialogu. Këtu nuk është çështje dëshirash. Është çështje kërkesash të tepërta për një komunitet, siç janë serbët ardhacakë, në token shqiptare, dhe kërkojnë të drejta të tepërta, sa nuk i ka asnjë minoritet në botë. Prandaj, këtu lind mosmarrëveshja dhe mungon kompromisi, pse Serbia kërkon të marrë nga Kosova. Nuk po kërkon Kosova të marrë nga Serbia, Serbia po kërkon të marrë nga Kosova.
Ndërkaq, në pyetjen se pse vetëm Kosova është e ndëshkuar me masa, Stano përsëriti se nga këto mase imune s’është as Serbia nëse nuk kontribuon në shtensionim të situatës në veri të Kosovës.
Ndërsa, Serbia, shkaktare e trazirave dhe e dhunës në veri të Kosovës, nuk u ndëshkua, nuk u morën masa ndaj saj. Masat ndaj Vuçiqit është dashur të merren që kur i tërhoqi policët dhe të gjithë zyrtarët e tjerë nga puna që ishin në veri të Kosovës. Është dashur të merren masa edhe kur nuk lejoi serbët të marrin pjesë në votime më 23 prill. Është dashur të merren masa ndaj Serbisë e Vuçiqit edhe me rastin e dhunës që shkaktuan serbët mbi trupat e KFOR-it në Zveçan. Nuk ndërmorën asnjë dhunë shqiptarët, por serbët mbi KFOR-in.
Me një fjalë, Kosova është në të drejtën e saj për mbrojtjen e territorit të vet, e jo Serbia që të pushtojë tokat e Kosovës.
Ti Stano, Lajçak e Borell, jeni duke e sanksionuar Kosovën pa të drejtë, ndërsa Serbinë që meriton, e tregoni si “konstruktive”, pse e keni tuajën e ia mbani krahun padrejtësisht. Asnjëherë nuk i thatë se Ksoova është shtet dhe e pavarur, të aprovuar edhe nga Gjykata Ndërkombëtare e Drejtësisë.
Një ditë do të dale drejtësia në shesh, të cilën nuk jeni duke e pare, pse nuk doni ta shihni.
Dhe, sikur Kosova e Serbia do të merreshin vesh, nuk do të kishit nevojë të ndërmjetësonit, pra do të ishit të panevojshëm.
Shtensionimin do të mund ta bëjë Vuçiqi, duke i detyruar serbët të marrin pjesë në zgjedhjet kur do që të organizohen, jo duke i penguar ata. Kjo edhe ashtu është një ndërhyrje në punët e brendshme të Kosovës, për çka ju është dashur ta dënoni e të merrni masa ndaj Serbisë. Shtensionimi i veriut të Kosovës është në duart e Vuçiqit, i cili kërkon tensionim të gjendjes.
