PRISHTINË, 10 Shtator/ATSH/-“Po qëndroj sot këtu për të festuar fundin e një rrugëtimi të gjatë. Por, gjithashtu po e shënoj fillimin e një rrugëtimi tjetër”, ka nisur fjalimin e tij, Presidentit Martti Ahtisaari, në seancën solemne të Kuvendit të Kosovës, me rastin e përfundimit të mbikëqyrjes ndërkombëtare të pavarësisë së Kosovës .
Ai tha se ky projekt – Propozimi Gjithëpërfshirës për Zgjidhjen e Statusit të Kosovës, të cilin historia e quajti Plani i Ahtisaarit, ishte rezultat i shumë muajve të punës së durueshme dhe të menduar të një ekipi diplomatësh dhe ekspertësh teknikë, në diskutim me përfaqësuesit e Kosovës dhe të Serbisë.Duke porositur gjeneratën e re të diplomatëve të Kosovës, Ahtisaari u shpreh se “ju lutem mos mendoni se ka rrugë të shkurtra për t’i gjetur. Ju lutem mos mendoni se ka truqe të reja kushtetuese për t’i provuar. Ju lutem mos i sakrifikoni nevojat e miliona njerëzve, që jetojnë në më shumë se një vend, e të cilët u janë nënshtruar aq shumë frustrimeve dhe pasigurive për një kohë shumë të gjatë”. Ai nënvizoi se suksesi në Kosovë dhe në Serbi, nuk do të gjendet në një shtrëngim duarsh dhe në një kryetitull lajmesh por në zbatimin e vazhdueshëm dhe me përkushtim të një plani i cili ka demonstruar rezultate të prekshme në terren në Kosovë. “Nëse në letrën time të fillestare që ia kam dërguar Sekretarit të Përgjithshëm unë e kisha ofruar jo vetëm një projekt, por një përshkrim të policëve të Kosovës, shqiptarë e serbë, vendet e rojës për Kishën Ortodokse Serbe; nëse e kisha ofruar përshkrimin sesi Qeveria në Prishtinë i ofron shërbimet administrative të cilat tani i ofron në veri të Lumit Ibër; nëse e kisha ofruar përshkrimin e asaj çfarë shohim sot në komunat me shumicë serbe që funksionojnë në kuadër të Kosovës së pavarur – atëherë Plani i Ahtisaarit do të shihej si një fantazi. Por kjo fantazi është bërë e vërtetë kjo arritje është suksesi ynë i përbashkët”, u shpreh ai. Kryenegociatori e kryendërmjetësi ndërkombëtar drejt pavarësisë së kosovës, Ahtisaari përfundoi duke theksuar se “propozimi Gjithëpërfshirës i ofron Kosovës mundësinë për stabilitet, prosperitet dhe qeverisje të mirë. Se a do të bëhet kjo mundësi realitet, kjo varet nga populli i Kosovës, dhe në veçanti nga ju, përfaqësuesit e tyre demokratik. Është në duart tuaja, dhe vetëm në duart tuaja, se a do ta bëni Kosovën me paragjykime apo tolerante, se a do ta bëni Kosovën të korruptuar apo të drejtë, se a do ta bëni Kosovën të dështuar apo të suksesshme”. Ndërsa ambasadori Wolfgang Ischinger tha se “propozimi i Ahtisaarit dhe kushtetuta e Kosovës e vitit 2008 përmbajnë të gjitha parimet dhe garancitë e nevojshme për të siguruar se kushdo në Kosovë – shqiptarët, serbët e Kosovës si dhe pakicat e tjera njëlloj – mund të jetojnë në mënyrë paqësore dhe në siguri, si dhe të gëzojnë të drejta të njëjta sikurse bashkëqytetarët e tyre”. Ai shprehu bindjen se një ditë përfaqësuesi i Kosovës do të ulet në tavolinë në Bruksel krah për krah me përfaqësuesin e Serbisë dhe do të diskutojnë për të ardhmen e Bashkimit Evropian, së bashku me shtetet tjera anëtare të BE-së. “Për ta shndërruar këtë vizion në realitet nevojiten të bëhen hapa substancialë përpara: Së pari, Kosova dhe Serbia duhet t’i normalizojnë marrëdhëniet e tyre, dhe së dyti, Bashkimi Evropian duhet t’i forcojë lidhjet e veta me Kosovën. Ecja përpara në këto fronte mund të duket sikur të zgjidhësh dy nyja Gordiane përnjëherësh”, nënvizoi ai. Duke vlerësuar se hovi në rrugën e Kosovës drejt Evropës është rritur gjatë muajve të fundit, ambasadori tha se “hapja e dialogut për liberalizim të vizave dhe studimi i fizibilitetit nga Komisioni, i cili do të përmbyllet së shpejti paraqesin arritje të rëndësishme”. “Jam i bindur se shtetet anëtare të BE-së të mbledhura sot këtu do të vazhdojnë të japin shtytje për përparim të mëtejmë. I mbetet Kosovës të tregojë përkushtimin e saj në rrugën drejt Evropës duke iu përmbajtur agjendës së saj të reformave”, përfundoi ambasadorit Wolfgang Ischinger./b.j//a.g/
THAÇI: NORMALIZIMI I RAPORTEVE ME SERBINË, I DOMOSDOSHËM PËR EVROPIANIZIMIN E RAJONIT
10/09/2012
THAÇI: NORMALIZIMI I RAPORTEVE ME SERBINË, I DOMOSDOSHËM PËR EVROPIANIZIMIN E RAJONIT
PRISHTINË, 10 Shtator /ATSH-Behlul Jashari/.- “Normalizimi i raporteve ndërshtetërore me Serbinë është i domosdoshëm për evropianizimin e rajonit”, deklaroi sot në Kuvend, kryeministri i Kosovës, Hashim Thaçi. Por, sipas tij, “ky normalizim me asnjë kusht nuk do të kaloj në kurriz të shtetësisë, sovranitetit dhe integritetit territorial të Kosovës”. Sipas Thaçit “ky normalizim do të jetë në funksion të integrimit dhe paqes mes shteteve të rajonit”. “Unë jam i bindur që me unitet dhe bashkëpunim do t’ia dalim të ndërtojmë Kosovën e re, Kosovën evropiane, për t’u integruar në NATO dhe në Bashkimin Evropian”, theksoi kreu i qeverisë kosovare. Në Kuvend folën edhe Piter Feith, i cili kumtoi vendimin e takimit të Grupit Drejtues Ndërkombëtar për Kosovën, Presidentja Atifete Jahjaga, kryetari i Kuvendit Jakup Krasniqi, Zëvendëskancelari/Ministër i Punëve të Jashtme i Austrisë, Michael Spindelegger, si dhe udhëheqësit e ndërmjetësuesit e negociatave drejt pavarësisë së Kosovës, Marti Ahtisaari, Frank Wisner e Volfgang Ischinger. Sot u zhvilluan edhe veprimtari të tjera, ndërsa ngjarje qendrore të martën do të jetë konferenca ndërkombëtare “Kaptinë e mbyllur në Ballkan”, ku do të paraqiten personalitete të shquara kombëtare e ndërkombëtare. Gjithashtu sonte në mbrëmje po festohet me një koncert publik nga bandat jazz dhe rock nga Kosova, Shqipëria, Maqedonia, Bosnja dhe Hercegovina në sheshin kryesor “Nëna Terezë” dhe pranë sheshit të pavarësisë “Ibrahim Rugova”, në Prishtinë./m.m/
GRUPI DREJTUES NDËRKOMBËTAR SHPALL PËRFUNDIMIN E MBIKËQYRJES SË PAVARËSISË SË KOSOVËS
10/09/2012
GRUPI DREJTUES NDËRKOMBËTAR SHPALL PËRFUNDIMIN E MBIKËQYRJES SË PAVARËSISË SË KOSOVËSLajmi i orës 16:44 ritransmetohet për efekt fotoje –
PRISHTINË, 10 Shtator/ATSH-B. Jashari/.- Grupi Drejtues Ndërkombëtar shpalli sot, përfundimin e mbikëqyrjes së pavarësisë së Kosovës dhe përfundimin e mandatit të Përfaqësuesit Civil Ndërkombëtar në Kosovë. Ky vendim erdhi pas konstatimit më 2 korrik 2012 se, Propozimi Gjithëpërfshirës për Zgjidhjen e Statusit të Kosovës (PGJS) është zbatuar në mënyrë substanciale dhe se, në përputhshmëri me zotimet e tyre, institucionet e Kosovës tani i kanë miratuar pakot e ndryshimeve të Kushtetutës dhe të legjislacionit primar duke i përfshirë në mënyrë të kënaqshme elementet e mbetura të PGJS-së brenda kornizës kushtetuese dhe juridike të Kosovës. Pas përfundimit të detyrave të nevojshme administrative të brendshme, Zyra Civile Ndërkombëtare do të mbyllet në fund të vitit 2012. Me efekt të menjëhershëm, PGJS-ja nuk ekziston më si fuqia juridike e veçantë dhe më e lartë, dhe Kushtetuta e Republikës së Kosovës tani përbën bazën e vetme të kornizës juridike të vendit. /m.m/
NISHANI, MESAZH URIMI PËR PËRMBYLLJEN E MBIKQYRJES SË PAVARËSISË SË KOSOVËS
10/09/2012
NISHANI, MESAZH URIMI PËR PËRMBYLLJEN E MBIKQYRJES SË PAVARËSISË SË KOSOVËS
TIRANË, 10 Shtator/ATSH / – Presidenti Bujar Nishani përshëndeti përmbylljen e mbikëqyrjes së Pavarësisë së Kosovës, duke e cilësuar atë “kurorëzim i përpjekjeve dhe veprës sublime të brezave të luftëtarëve, dëshmorëve, njerëzve të dijes, politikanëve dhe aleatëve tanë të lirisë”. “Ju drejtohem në një moment solemniteti dhe reflektimi, kur e ardhmja dhe e shkuara e Kosovës ndahen dhe bashkohen njëherësh. Ndahen e shkuara e hidhur nga e ardhmja e sigurtë plot begati për të gjithë qytetarët e Kosovës, të çfarëdo etnie dhe përkatësie fetare. Bashkohen përpjekjet dhe përkushtimi për liri, demokraci dhe prosperitet. Përmbyllja e mbikëqyrjes së Pavarësisë së Kosovës është kurorëzimi i përpjekjeve dhe veprës sublime të brezave të luftëtarëve, dëshmorëve, njerëzve të dijes, politikanëve dhe aleatëve tanë të lirisë. Përulemi me mirënjohje para veprës së tyre!”, shkruan Presidenti në mesazhin e tij. “Republika e Kosovës sapo ka nisur udhëtimin e saj të gjatë si një shtet plotësisht i pavarur dhe sovran që ka tërësisht në duart e saj të ardhmen e qytetarëve dhe të brezave që do të vijnë. Më lejoni t’ju uroj në këtë ditë ogurbardhë, gëzimi i të cilës bëhet pjesë e festimit tonë të 100-vjetorit të shtetit të parë shqiptar”, vijon më tej Nishani. Presidenti e konsideron këtë ditë të mbushur me entuzizëm, por dhe përgjegjësi për qytetarët dhe përfaqësuesit e institucioneve. “Kjo është një ditë e mbushur me entuziazëm, por edhe me një përgjegjësi të madhe. Qytetarët dhe përfaqësuesit e institucioneve të Kosovës do të kenë përgjegjësinë e plotë për të punuar për konsolidimin e demokracisë dhe shtetit të së drejtës, për prosperitetin ekonomik dhe të ardhmen euro-atlantike të shtetit më të ri në moshë, por që ka fituar tashmë pjekurinë falë përkushtimit dhe urtësisë së të gjithë aktorëve politikë, institucionalë dhe shoqërisë civile”, shkruan Presidenti Nishani. “Një thënie e vjetër thotë: ‘Liria punon…’. Dhe neve nuk na mbetet gjë tjetër veçse të punojmë për ta shijuar lirinë, për ta bërë të punojë në të mirën e gjithë qytetarëve të Kosovës pa dallim etnie apo feje. Ne jemi të gjithë bashkë për të përballuar sfidat dhe gëzuar sukseset e së ardhmes, sepse kemi të njëjtin destinacion dhe të njëjtën aspiratë, të bashkohemi në familjen evropiane, ku liria ka dimensionet më të mëdha dhe e ardhmja është më e begatë. Por, gjithçka me punë dhe përkushtim. Ne do t`ia dalim, sepse kemi dëshmuar se dijmë të luftojmë, të punojmë dhe të fitojmë. Gëzuar lirinë! Zoti e bekoftë Kosovën!”, përfundon mesazhi i urimit të Presidentit Nishani./e.ç/. /a.g/
KACIN: BE DO TË VIJOJË MBËSHTETJEN PËR KONSOLIDIMIN E INSTITUCIONEVE NË KOSOVË
10/09/2012
KACIN: BE DO TË VIJOJË MBËSHTETJEN PËR KONSOLIDIMIN E INSTITUCIONEVE NË KOSOVË PRISHTINË, 10 Shtator/ATSH-B. Jashari/.- “Përfundimi i mbikëqyrjes së pavarësisë së Kosovës ёshtё gjithashtu një moment kur duhet kujtuar sa rrugё duhet tё kaloj akoma Kosova pёr konsolidimin e vёrtetё tё sundimit tё ligjit”, tha sot, Zёvendёskryesuesi i Delegacionit tё Parlamentit Evropian pёr Evropёn Juglindore, Jelko Kacin. “EULEX-i dhe KFOR-i mbeten nё terren pёr të ndihmuar institucionet nё Prishtinё, por pёrgjegjёsia e Qeverisё sё Kosovёs nё zbatimin e sundimit tё ligjit rritet edhe mё shumё sesa nё periudhёn e kaluar”, vijon deklarata për shtyp e zyrtarit të lartë europian. Kacin u shpreh se “tё drejtat e njeriut duhet tё garantohen për tё gjithё qytetarët e Kosovёs, sidomos për komunitetet pakicё dhe serbёt e kthyer”. “Liderёt kosovar duhet tё tregojnë pjekuri politike dhe pёrgjegjёsi duke u pёrpjekur mё shumё t’i afrohen komunitetit serb nё veri tё Kosovёs. Prishtina, sikurse deri mё tani, do tё ketё mbёshtetje tё fuqishme tё institucioneve tё BE-sё pёr tё vazhduar me reformat evropiane, fuqizimin e pavarёsisë institucionale dhe politikёn e marrёdhёnieve tё fqinjёsisë së mirë. Rritja ekonomike dhe vendet e reja tё punёs varen direkt nga suksesi nё kёtё fushё. Para Serbisë dhe Kosovёs tani shihen sfida të reja tё cilat kёrkojnë qёndrime pro-aktive me shikim nё tё ardhmen evropiane, dhe jo nё konfliktet e tё kaluarёs”, tha ai./m.m/
KOSOVË/ KUVENDI ZHVILLON SEANCËN E PARË NË PAVARËSINË E PLOTË TË VENDIT
10/09/2012
KOSOVË/ KUVENDI ZHVILLON SEANCËN E PARË NË PAVARËSINË E PLOTË TË VENDIT
PRISHTINË, 10 Shtator /ATSH-B.Jashari/.- Kuvendi i Kosovës po zhvillon një seancë speciale – solemne, të parën në pavarësinë e plotë të vendit, menjëherë pasi Grupi Drejtues Ndërkombëtar shpalli sot në Prishtinë, përfundimin e mbikëqyrjes së pavarësisë së Kosovës dhe përfundimin e mandatit të Përfaqësuesit Civil Ndërkombëtar. Në fjalën e mbajtur me këtë rast, Presidentja e Kosovës, Atifete Jahjaga tha se, “sot është një ditë e shënuar për Kosovën”. “Me përmbylljen me sukses të fazës së mbikëqyrjes së pavarësisë, që është sukses i yni i përbashkët, Kosova tregon se institucionet dhe qytetarët e saj janë të përkushtuar dhe të përgjegjshëm t’i kryejnë të gjitha detyrimet në funksionimin e shtetit”, tha Jahjaga. “Ne sot jemi shoqëri e njerëzve të lirë, vend i shanseve dhe mundësive të barabarta, jemi shtet qytetar në të cilin të gjithë njerëzit pa marrë parasysh përkatësinë kombëtare, fetare, racore, gëzojnë të gjitha liritë dhe të drejtat në mënyrë të barabartë”, vijoi ajo. Presidentja e Kosovës siguroi se, “do të dialogohet me qytetarët në tre komunat në veri të territorit të Kosovës duke arritur mirëkuptimin se veprimi brenda institucioneve dhe qeverisja në nivel komunal do të jetë e suksesshme edhe në këtë pjesë të territorit, duke iu mundësuar qytetarëve që nëpërmjet zgjedhjeve të lira dhe të ndershme të zgjedhin përfaqësuesit dhe udhëheqësit e tyre legjitimë, që do të përfaqësojnë interesat e tyre”. “Kontribut për paqen dhe stabilitetin dhe për normalizimin dhe relaksimin e marrëdhënieve ndërmjet shteteve ne shohim edhe normalizimin e plotë të marrëdhënieve ndërmjet Republikës së Kosovës dhe Republikës së Serbisë. Ne e kemi shprehur përkushtimin tonë që të zhvillojmë marrëdhënie si dy shtete sovrane dhe të pavarura. E respektojmë dhe e mirëpresim si tejet të nevojshme ndihmën e Bashkimit Evropian dhe të Shteteve të Bashkuara të Amerikës në këtë proces, sidomos në dialogun që po zhvillohet në Bruksel ndërmjet dy vendeve tona”, tha ajo. Jahjaga u shpreh se ‘Kosova po bënë reforma të thella në të gjitha fushat, përfshirë edhe ato në administratë, për të arritur standarde dhe për ta përafruar vendin me BE-në”. /m.m/
OBAMA: PËRFUNDIMI I MBIKËQYRJES SË PAVARËSISË, ARRITJE MADHORE PËR KOSOVËN
10/09/2012
OBAMA: PËRFUNDIMI I MBIKËQYRJES SË PAVARËSISË, ARRITJE MADHORE PËR KOSOVËN
PRISHTINË, 10 Shtator /ATSH-B.Jashari/.-Presidenti i SHBA-së, Barack Obama përshëndeti sot, vendimin për përfundimin e mbikëqyrjes së pavarësisë së Kosovës. Përmes një deklarate për shtyp të publikuar nga Ambasada e SHBA-së në Prishtinë, Presidenti Obama vlerëson se “pas gati katër viteve e gjysmë, përmbushja e dispozitave të Propozimit Gjithëpërfshirës për Zgjidhjen e Statusit është një arritje madhore për gjithë qytetarët e Kosovës”. “Mirëpres dhe përkrah fuqishëm lajmërimin e sotëm nga Grupi Ndërkombëtar Drejtues se mbikëqyrja ndërkombëtare e pavarësisë së Kosovës ka përfunduar. Me optimizmin, energjinë dhe vendosmërinë që është karakteristike për popullin e saj, Kosova ka bërë përparim të rëndësishëm në forcimin e arritjeve të pavarësisë dhe në ndërtimin e institucioneve të një shteti modern, shumetnik, përfshirës, dhe demokratik”, thuhet në këtë deklaratë. Presidenti i SHBA-së thekson se, “ka ende punë për të bërë tani që udhëheqësit e Kosovës marrin përgjegjësi të plotë për të siguruar se parimet e mishëruara në deklaratën e pavarësisë dhe në Kushtetutë do të plotësohen për çdo qytetar”. “Kosova duhet të vazhdojë të angazhohet konstruktivisht me fqinjët e saj dhe të punojë për të zgjidhur çështjet e pazgjidhura, posaçërisht ato me Serbinë. Bërja e kësaj do të përforcojë pavarësinë, sovranitetin dhe integritetin territorial të Kosovës, dhe do të shërbejë për promovimin e stabilitetit nga i cili varen perspektivat Euroatlantike të rajonit. Në emër të popullit amerikan e uroj qeverinë, parlamentin, dhe popullin e Kosovës në këtë moment historik, në të cilin Kosova bën edhe një hap të rëndësishëm drejt vendit të saj të drejtë në një Evropë të lirë, të tërë, dhe paqësore”, përfundon deklarata e Presidentit Obama. /m.m/
|
