Këngëtarja shqiptare nga Shqipëria Parashqevi Simaku në pritjen e Vitit të Ri 1997 në Kosovë-Prishtinë duke i dhënë deklaratë gazetarit Behlul Jashari.
Risjellim sot shkrimin me titullin “Shpresë se s’ndërrojnë veç vitet”, të para 27 viteve, ku mes tjerash, shkruaja:
Ky Vit i Ri në Kosovë u prit për herë të parë me valimin e flamurit amerikan në Zyrën e USIA-s në Prishtinë. Vitin që shkoi për Kosovën kishte shumë momente të rëndësishme, dhe sigurisht më e rëndësishmja ishte dita historike e 5 qershorit, kur në Prishtinë u hap Zyra Amerikane, përfaqësia e prania e parë e një shteti në Kosovë, e me mesazhin e SHBA-ve që e përcolli ndihmëssekretari amerikan i shtetit Kornblum për popullin e Kosovës: “Jemi zotuar për të ardhmen dhe lirinë tuaj”./
-Presidenti i Republikës së Kosovës Dr. Ibrahim Rugova Vitin e Ri 1997 e priti në ambientin familjar në Prishtinë/
-Vitin e Ri 1997 në Kosovë – në Prishtinë e pritën edhe diplomati shqiptar Besnik Konçi dhe këngëtarja poashtu nga Shqipëria, Parashqevi Simaku…Çka më thanë gjatë bisedave…/
PRISHTINË, 2 Janar 2024/ Si u prit Viti i Ri 1997 në Kosovë në prag lufte – shkruaja para 27 viteve me titullin “Shpresë se s’ndërrojnë veç vitet”. Në Prishtinë e pritën diplomati shqiptar Besnik Konçi – misioni diplomatik i ambasadës së Shqipërisë dhe këngëtarja poashtu nga Shqipëria Parashqevi Simaku.
Gazeta DIELLI e Federatës Pan-Shqiptare të Amerikës VATRA , si dhe portali Drini, e risjellin sot shkrimin ashtu si u botua në Prishtinë në 4 Janar 1997 në gazetën e rezistencës “Bujku” pjesë e lëvizjes e luftës për liri e pavarësi, kryeredaktor i parë – themelues i së cilës isha, e që sfidonte ndalimin e dhunshëm nga Serbia okupatore të gazetës tradicionale të Kosovës Rilindja, të vetmes në gjuhën shqipe.
Shkrimin-raportimin e kam dërguar edhe në Agjencinë Shtetërore-Zyrtare të Lajmeve të Shqipërisë, për të cilën raportoja si korrespondent në Kosovë nga 24 Maji 1992 i zgjedhjeve të para pluraliste parlamentare e presidenciale në Kosovë, kur Dr. Ibrahim Rugova u zgjodh President. Edhe duke marrë shkrimet nga kjo Agjenci – Agjencia Telegrafike Shqiptare e botuar në gazetën “Bujku”, që nga numri i parë që doli në 18 Janar 1991, themeluam bashkëpunimet e para të medias Kosovë-Shqipëri.
Në Biblioteken Kombëtare të Shqipërisë gjejë se shkrimi është botuar edhe në gazetën e ndaluar në Kosovë Rilindja që dilte në Tiranë, në 5 Janar 1997 – titulli “Shpresë se s’ndërrojnë veç vitet” në regjistër nën numrin rendor 14 në këtë lidhje:
Shkrimi i përshkruar nga gazeta e rezistencës “Bujku” e 4 Janarit 1997 – faqe 1 dhe 17:
Mbititulli: KOSOVA NË NDËRRIM TË MOTMOTEVE
Titulli: SHPRESË SE S’NDËRROJNË VEÇ VITET
-Nëntitujt: Shumica në Kosovë natën e Vitit të Ri e kaluan në shtëpitë e familjet e tyre.- Në ambientin familjar Vitin e Re e priti edhe presidenti Rugova.-Diplomati shqiptar Besnik Konçi në pritje të Vitit të Ri në Prishtinë: “Shpresojmë se do të hidhen hapa konkretë në drejtim të zgjidhjes së çështjes së Kosovës”/
Kosova e priti Vitin e Ri 1997 para së gjithash me zotime për më shumë angazhim dhe punë, me besim, shpresë e urime për ndërrim jo vetëm të moteve, por mbi të gjitha të gjendjes së rëndë të okupimit, për realizimin e vullnetit kombëtar, politik e demokratik për lirinë e pavarësinë e Kosovës.
Shumica e kosovarëve natën e ndërrimit të motmoteve e kaluan nëpër shtëpitë e familjet e tyre, me gëzimet e jetës e me hallet e brengat e përditshmërisë, që vështirë harrohen, qoftë edhe për një çast.
Në ambientin familjar në Prishtinë Vitin e Ri e priti edhe presidenti i Republikës së Kosovës dr. Ibrahim Rugova.
Ky Vit i Ri në Kosovë u prit për herë të parë me valimin e flamurit amerikan në Zyrën e USIA-s në Prishtinë. Vitin që shkoi për Kosovën kishte shumë momente të rëndësishme, dhe sigurisht më e rëndësishmja ishte dita historike e 5 qershorit, kur në Prishtinë u hap Zyra Amerikane, përfaqësia e prania e parë e një shteti në Kosovë, e me mesazhin e SHBA-ve që e përcolli ndihmëssekretari amerikan i shtetit Kornblum për popullin e Kosovës: “Jemi zotuar për të ardhmen dhe lirinë tuaj”.
Shumë shqiptarë nga Kosova e pritën Vitin e Ri në Shqipëri, si edhe nga Shqipëria në Kosovë. Shumë kalime të kufirit Kosovë-Shqipëri në vendkalimin kufitar në Vërmicë afër Prizrenit kishte në prag dhe pas natës së ndërrimit të motmoteve.
Ky është një realitet i një momenti tjetër të rëndësishëm të vitit të kaluar, hapit të parë që u bë në liberalizimin e hapjen e kufirit Kosovë-Shqipëri me heqjen e regjimit të vizave dalëse, duke filluar nga 1 prilli.
Viti i Ri u prit në Prishtinë e qytete e lokalitete të tjera edhe nëpër lokale hoteliere, në të cilat gjatë gjithë natës nuk pushoi kënga shqiptare e shumë artistëve të estradës nga Kosova e Shqipëria. Në Kosovë, në restorantin “Dora” në Prishtinë Vitin e Ri e priti edhe misioni diplomatik i ambasadës së Shqipërisë në Beograd, në krye me të ngarkuarin me punë në këtë ambasadë, Besnik Konçin. Këtu, si një surprizë ishte ardhja për herë të parë në Prishtinë e në Kosovë e këngëtares së mirënjohur nga Shqipëria Prashqevi Simaku, me këngët e së cilës kulmonte atmosfera festive. Pikërisht në orën e ndërrimit të motmoteve Simaku deklaroi për “Rilindjen” se “në Kosovë, në Prishtinë, në këtë mbrëmje ëndrrash e magjike midis motrave dhe vëllezërve kosovarë ndihem shkëlqyeshëm, shkëlqyeshëm, shkëlqyeshëm” dhe uroi të gjitha të mirat për Vitin e Ri.
Derisa nëpër familjet shqiptare jehonte programi festiv i Radiotelevizionit Shqiptar e nëpër ambientet hoteliere biçiste po ashtu kënga shqipe dhe të gjitha urimet kishin mesazhe lirie, paqeje e mirëqenieje, në Prishtinë e në anë të tjera të Kosovës në orët e ndërrimit të moteve pati një shfrenim provokues e kërcënues të shtënash nga armët e serbëve.
Që në minutat e para të Vitit të Ri në Kosovë u dëgjuan edhe vaje që sjellin gëzim, të foshnjave të porsalindura.
Një nënë shqiptare nga Suhareka lindi trenjakë menjëherë pas mesnatës, ndërsa fëmija i parë që lindi në këtë vit në maternitetin e shoqatës humanitare bamirëse “Nënë Tereza” në Prishtinë ishte vajzë. Vajza e posalindur u pagëzua Gonxhe, me emrin e nobelistes e humanistes së madhe shqiptare Nënë Terezës – Gonxhe Bojaxhiu. Sipas parashikimeve, brenda këtij Viti të Ri në Kosovë do të lindin më se 50 mijë fëmijë. Kosova do të shtohet për aq banorë sa ka sot qyteti i Gjakovës. Në Kosovë e pritën Vitin e Ri edhe shumë shqiptarë që ia dhanë lamtumirën mërgimit apo që erdhën për disa ditë për këtë festë në familjet e tyre nga Evropa Perëndimore e vendet e tjera të botës. Kthimi përgjithmonë në Kosovën e lirë është urimi e dëshira e tyre më e madhe.
Reporter: B.JASHARI
Fotoreporter: I. BYLYKBASHI
Gazeta-BUJKU-4 janar 1997- fq 17 – vijim shkrim Behlul Jashari
DEKLARATË E DIPLOMATIT SHQIPTAR BESNIK KONÇI NË PRITJEN E VITIT TË RI NË PRISHTINË
VIT I RËNDËSISHËM PËR KOSOVËN
Diplomati shqiptar Besnik Konçi në orët e ndërrimit të moteve në pritjen e Vitit të Ri në kryeqytetin e Kosovës Prishtinë, i pyetur se si e vlerëson vitin e kaluar dhe cilat janë pritjet e tij në Vitin e Ri për Kosovën, për “Rilindjen” deklaroi:
Së pari dua gjithë popullit shqiptarë të Kosovës t’ia uroj nga zemra gëzuar Vitin e Ri 1997!
Qoftë ky vit i mbarë, i realizimit të dëshirave të të gjithë shqiptarëve të Kosovës, i lumturisë në familje dhe i prosperitetit në të gjitha fushat.
Kemi lënë prapa një vit pune, një vit përpjekjesh, një vit të mbushur me evenimente të rëndësishme dhe që padyshim ka pasur rezultate, dhe që natyrisht ka lënë diçka edhe për Vitin e Ri.
Uroj që ky Vit i Ri të jetë vit i realizimit të aspiratave të shqiptarëve të Kosovës, të cilët organizojnë rezistencën e tyre paqësore, dhe do të shprehja shpresën se viti 1997 do të jetë vit i rëndësishëm në realizimin e një dialogu ndërmjet Prishtinës e Beogradit në prani të një pale të tretë për zgjidhjen e statusit të Kosovës. Shpresojmë se do të hidhen hapa konkretë në këtë drejtim gjatë këtij Viti të Ri, përfundoi i ngarkuari me punë në Ambasadën e Shqipërisë në Beograd Besnik Konçi.
B.J.
Legjenda e fotografisë në faqen 17 të gazetës “Bujku”:
Diplomati shqiptar Besnik Konçi jep deklaratë për “Rilindjen” me rastin e Vitit të Ri (Në foto me intervistuesin – gazetarin Behlul Jashari, në mbrëmjen e 31 Dhjetorit 1996 në Prishtinë)
Gazeta-BUJKU-4 janar 1997- fq 1 shkrim Behlul Jashari
