Teuta Haxhijaj, tregimtare
___
Pas me shumë se 6 muaj jashtzakonisht të stërngarkuar n’punë dhe n’shpi, shkuam me prindërit n’pushim te pjesa tjeter e familjes n’Kosovë.
Atje erdh puna qashtu që më duhej të zgjedhja n’mes shkuarjes n’det ose me ndejtë 10 ditë me nanën n’shpi dhe natyrisht unë e zgjodha këtë të dytën, plus një “listë” të punëve që kisha m’i ba: m’i lëshu pulat herët e m’i nguju n’mbramje, me ju qitë me hangër, m’u kujdes per qenin, per macën, m’u çu herët me ujitë serën, m’i nxjerrë kepët… plot punë de.
E megjithatë nanë e bijë po i kalonim ditët më të bukura të mundshme bashkë. Qetesi, ushqim bio, kohë pa stres.
Por ditët e numërueme kalojnë shpejt dhe erdhi koha me iu kthy punës e perditshmërisë pas 3 javësh pushim.
Tortura e alarmit herët n’mengjes, më duket që ua kalon të gjitha torturave tjera, është e pakrahasueshme bile. E tillë ishte edhe n’mengjesin e parë të punës pas pushimit. Edhe pse shumë herët dhe pergjumshëm, i mendova rend të gjitha alternativat e mundshme se qysh kisha mujtë me jetu dyqysh pa punu por asnjëra prej tyne nuk ishte e kënaqshme dhe prap s’pata çare pa u çu. Pa pik’ disponimi, hundë e buzë bashkë, nisa me qitë kafen.
N’zhveshtoren e repartit kishin qenë edhe tri kolege tjera te cilat flisnin e keshnin. Po ku e merrnin gjithë atë disponim aq herët se, plus ditë e hane, Zoti e din. Nejse, shyqyr që s’janë tetanë si unë, sytë gati te mbyllun nga m’rrolat se mos pyet kush për pacienta.
Mbasi i datha patiket e pashë që i kisha mbathë dy çorapë me ngjyra të ndryshme. Hajt more, i thash vetës, se nuk m’i sheh kerkush, po kush m’i kqyrë çorapat se. I mora pantollat m’i veshë…
– Kolege, po m’doket se m’u pshtjellën pantollat me t’njanës prej juve se po m’binë t’ngusht. A?
I kontrolluan numrat e pantollave edhe ato e edhe unë dhe erdhëm n’përfundim se ishin përnime pantollat e mi. Qysh more?! E tash?! -“Këtë e ka pushimi”- tha njana prej tyne tuj keshë për me vazhdu edhe tjerat pastaj. Pushimi jo por specat me mazë, buka e shpisë, flijat…
Nga ai mëngjes kanë kalu gati tri javë. Përveç kafesë së zezë futë dhe si zakonisht pa sheqer, të tjerat janë reduktu n’minimum. Mirë po shkon puna. Plus po m’bjen ma lirë se s’kam hesap m’i ble tana teshat e reja tash. Qy.
