Donika Sherifi /RTK
Ish-ministri i Drejtësisë, Hajredin Kuçi, është deklaruar i pafajshëm lidhur me akuzat për pengim në administrim të drejtësisë nga Dhomat e Specializuara në Hagë.
Ai ka thënë se dita e sotme është një prej momenteve më të errëta për të si njeri i drejtësisë, si profesor i drejtësisë, ish-zëvendëskryeministër e ish-ministër i Drejtësisë për disa mandate.
“Më lejoni të jem i qartë, unë nuk kam bërë asnjë vepër penale, jam i pafajshëm dhe kam besim të plotë se do të lirohem nga akuzat. Në aktakuzë jam me presidentin Hashim Thaçi, më lejoni të them se Hashimin e kam mik, njihemi vite të gjata, dhe kemi punuar gjatë. Gjatë tërë punës së bashku kemi punuar dhe udhëhequr mbi parimin e drejtësisë, respektimit të saj dhe kemi besuar në drejtësi”, tha Kuçi.
Aktakuzën e ngritur nga Prokuroria e Specializuar, Kuçi e quajti si prekje të dinjitetit të tij njerëzor, profesional dhe reputacionit të tij. Ai theksoi se nuk është takuar me dëshmitarë sa ishte pjesë e ekipit mbrojtës të Kadri Veselit.
“Edhe në kohën sa isha në ekipin mbrojtës, edhe atëherë kur kam pas mundësi që përmes ligjit dhe protokollit të kësaj gjykate të takohem me dëshmitarët, këtë të drejtë nuk e kam shfrytëzuar asnjëherë, çka mund të vërtetohet. Nuk kam dashur që të fitohet perceptim për ndonjë keqkuptim eventual”, shtoi Kuçi.
Ndërkohë, aktakuzën ndaj tij e lexoi sekretarja e gjykatës sipas së cilës, ekziston dyshimi i bazuar mirë që Hajredin Kuçi mban përgjegjësi penale sipas nenit 163 të ligjit për kryerjen e veprës penale të mosbindjes së gjykatës në pikën 19, sipas nenit 17 të kodit penal të Kosovës, marrëveshje për kryerje me Hashim Thaçin të veprës penale të mosbindjes ndaj gjykatës në pikën 18 të kodit penal të Kosovës.
E prokurori i specializuar tha se ka dyshime që Kuçi ka marrë detyrë nga Thaçi për të kontaktuar me dëshmitarët, mbi të cilën është ngritur aktakuza për mosbindje ndaj gjykatës.
KOSOVË – KUÇI: PËRFUNDIMI I PAVARËSISË SË MBIKËQYRUR, PRIORITETI KRYESOR PËR VITIN 2012
PRISHTINË, 24 Dhjetor /ATSH-Behlul Jashari/.-Përfundimi i mbikëqyrjes së pavarësisë do jetë preokupimi i parë i qeverisë së Kosovës në Vitin e Ri 2012, tha sot për ATSH-në zv/kryeministri kosovar e ministër i Drejtësisë, Hajredin Kuçi.
“Preokupimi ynë i parë do të jetë angazhimi në përfundimin e pavarësisë së mbikëqyrur gjatë vitit 2012”, u shpreh ai.
Ndërsa preokupimi i dytë, sipas zv/kryeministrit Kuçi, do të jetë plotësimi i kërkesave që dalin nga raportet e Kosovës me BE-në, në veçanti në liberalizimin e vizave, në marrëdhëniet tregtare dhe për anëtarësimin në Bankën për Rindërtim dhe Zhvillim.
“Dhe, angazhimi ynë, po ashtu, do të jetë për rend dhe ligj dhe për ekonomi, i vazhdueshëm”, theksoi numri dy i qeverisë së Kosovës, i pyetur për zhvillimet më të rëndësishme në vitin e ri në Kosovë.
Duke folur për pritshmëritë në vitin 2012-ta në veri të Kosovës, Kuçi tha se”sa i përket angazhimit në veri, ne presim që të kemi angazhime të shtuara, në koordinim të plotë edhe me KFOR-in e EULEX-in, dhe presim që atje do të ketë respektim të tërësisë territoriale, sovranitetit të plotë dhe funksionalizim të institucioneve tona. Në këto do të jemi të pandalshëm, do të jemi të vazhdueshëm, dhe shumë insistues, po natyrisht gjithmonë duke i përdorur instrumentet tona kushtetuese dhe ligjore dhe në koordinim me faktorë ndërkombëtarë”.
Zv/kryeministri dhe ministri i Drejtësisë tha se për ministrinë që drejton “problematikë kryesore mbetet funksionalizimi i gjykatave në veri të Kosovës”.
Ai shprehu besimin se do të ndërtohet një ambient më i mirë për funksionalizimin e gjykatave edhe në veri të vendit.
Ministri Kuçi ritheksoi se “në çështjen shumë me rëndësi për vitin tjetër, përfundimin e pavarësisë së mbikëqyrur, ku parashihet edhe bartja e kompetencave nga institucionet ndërkombëtare te ato vendore, përfshirë edhe kompetencat e EULEX-it, Ministria e Drejtësisë do ta ketë rolin kyç, do t’i kryejë të gjitha obligimet e veta, duke ngritur kapacitetet, duke siguruar kuadrin profesionl dhe duke ndërtuar strukturën adekuate ligjore”.
Zv/kryeministri e ministri Hajredin Kuçi, në takimin e fundvitit me median tha se gjatë vitit 2011, Ministria e Drejtësisë ka realizuar progres të dukshëm në shumë fusha brenda fushëveprimit, kompetencës dhe kapaciteteve të saj. “Gjatë kësaj periudhe kohore, kujdes të veçantë pa dyshim Ministria e Drejtësisë i ka kushtuar përmbushjes së obligimeve të dala nga Raporti i Progresit 2010. Gjithashtu, kujdes iu është kushtuar edhe rekomandimeve dhe konkluzioneve nga takimi i dytë i nën-komitetit për Drejtësi, Liri dhe Siguri në kuadër të Dialogut të Procesit të Stabilizim Asociimit”, theksoi ai.
Kuçi tha se beteja për drejtësi nuk është e lehtë, por u shpreh “shumë i bindur që çdo qytetar i Kosovës do të jetë i gatshëm të japë kontributin e vet në këtë betejë për vënien e rendit dhe ligjit në gjithë territorin e Republikës sonë”.
Një delegacion i nivelit të lartë i Kosovës, i kryesuar nga zv/kryeministri dhe Ministri i Drejtësisë, Hajredin Kuçi, bëri keto ditë një vizitë pune në Bruksel, u ka patur takime me zyrtarë të lartë të BE-së.
Në takim me Drejtorin e Drejtoratit për Menaxhim të Krizave dhe Planifikimit, Walter Stevens, është diskutuar për fazën fillestare të përfundimit të pavarësisë së mbikëqyrur. Me theks të veçantë është folur për sistemin e drejtësisë, për policinë dhe segmentë të tjera, ku do të mund të fillonte zvogëlimi i prezencës së pjesëtarëve të misionit të BE-së, e po ashtu është konstatuar ngritja e kapaciteteve të institucioneve vendore.Si sfidë e veçantë në vitin që vjen është cilësuar situata në veri dhe është folur për veprimet që duhen ndërmarrë për rikthimin e normalitetit atje.
Zv/kryeministri Kuçi ka shtruar si të domosdoshme nevojën e veprimeve konkrete në veri, si dhe ka kërkuar që të fillojë zbatimi i marrëveshjeve tashmë të arritura me Serbinë./s.s./
