I shikova intervistat te Grida Duma
Të parën e pashë me Abdixhikun: kishte korrigjuar gabimin e parë dhe tani e bëri intervistën me imazhin e Rugovës në mur. Ky reflektim, ky pendim është për t’u përshëndetur. Rugova nuk mund të zhbëhet as nga LDK-ja, as nga shteti i Kosovës.
Përshtypja ime është kjo: Abdixhiku mund të bëhet një lider i madh, por ende jo, sepse nuk distancohet hapur nga politika e Isa Mustafës, e cila shërbeu si patericë e Thaçit – me të cilin Rugova nuk dëshironte bashkëpunim.
Pa një distancim të qartë dhe përjashtimin e Mustafës nga LDK-ja, e cila nën udhëheqjen e tij ra në 12%, kjo parti nuk mund të rikthehet në atë që ishte dikur.
Gabimi i dytë i Abdixhikut: ai premton shumë investime – ambicie të mëdha – por nuk thotë asnjë fjalë për ndërtimin e shtetit ligjor. Demokracia nuk funksionon pa prokurori dhe gjykata të pavarura. Sot, ato dominohen nga ithtarët e PDK-së, LDK-së dhe AAK-së.
Në intervistën e tij, Abdixhiku tha një të pavërtetë, dhe Grida Duma ndoshta nuk e vuri re ose nuk e dinte. Ai deklaroi se “Vetëmenaxhimi” i Kurtit, të cilin sërbet e refuzojnë është autonomi territoriale dhe se ai nuk do ta pranonte kurrë.
Por Grida nuk ia kujtoi se Vuçiqi dhe Perëndimi e kërkojnë me këmbëngulje Asociacionin – atë të Mustafës, të cilin e ka hedhur poshtë Kushtetuta. Lajçaku madje pat propozuar ndryshime kushtetuese, jo korrigjimet e Gjykatës Kushtetuese.
Abdixhiku do të kishte fituar më shumë vota sikur të distancohej edhe nga Asociacioni i Mustafës, në vend që ta heshtte atë.
Heshtja mund të lërë të kuptohet si pranim. Sidoqoftë, ai ka potencialin të bëhet një lider i madh, por duhet të shkëputet dhe të jetë kritik ndaj gabimeve që ka bërë partia e tij nën drejtimin e Mustafës.
Dhe, të tregojë mospajtimin me sjelljet e Prokurorisë.
Është e drejtë të kritikojë gabimet e Qeverisë, por jo duke shpërfillur gabimet e mëdha të paraardhësit, sepse në kohën e Mustafës, LDK-ja nuk i shërbente Kosovës, por Hashim Thaçit.
Nuk duhej të bëhej kryetar nderi i partisë njeriu që gati e shkatërroi LDK-në. Ky është fakt. Nuk duhet shpërfillur. Së paku jo të shpërblehet. Dhe, duhet të mendojë seriozisht si të përfitojë dhe kthejë Listën Guxo në parti, tok me Vjosën. Kosova tani i ka tre liderë: Vjosën, Kurtin dhe Abdixhikun. Ky i fundit i treti, sepse ende nuk e ka pasur mundësin të dëshmohet si dy të parët.
Kosova ende nuk ka një shtet të së drejtës. Opoziat beson se e ka atë shtet. Nga 250 kallëzime penale të dërguara nga Qeveria në Prokurori, asnjëra nuk është shqyrtuar. Këtë nuk e përmend Abdixhiku dhe gabon shumë.
Albin Kurti
Kurti tregoi dhe përsëriti se marrëdhëniet me Perëndimin janë të mira dhe vuri në dukje mosveprimin e Prokurorisë, e cila ka paralizuar shtetin juridik.
Përshtypja ime nga intervista është se Kurti dëshiron partneritet, por jo që të marrë vendime që Perëndimi i konsideron të drejta nëse ato dëmtojnë interesat e Kosovës. Ai ka arritur suksese të brendshme, por ka një ftohje në raportet e jashtme – diçka që ai nuk e pranon. Për Kurtin flasin veprat. Ai mund të vlerësohet ose ndëshkohet, dhe këtë mundësi e ka sot votuesi.
Kurti ka bërë armiq sepse dëshiron sekuestrimin e pasurisë së vjedhur. Pikërisht nga këto grupe njerëzish ai ka kundërshtarët më të zjarrtë. E quajnë komunist, enverist etj., por në fakt, aty ku prokuroria dhe gjykatat i nënshtrohen politikës, janë vende me mentalitet komunist.
Në Kosovë, ligji nuk zbatohet si duhet; gjyqtarët dhe prokurorët veprojnë siç u dikton opozita që ua ka siguruar ose dhuruar vendet e punës. Këta prokurorë, në 25 vitet e fundit, nuk kanë gjykuar asnjë nga ata që dikur s’kishin asgjë dhe sot janë milionerë.
Prokuroria e Kosovës është kundër shteti dhe administratë paralele, që pengon ndërtimin e shteti ligjor. Opozita nuk e sheh këtë por në heshtje e përshëndet. Kjo heshtje, përkthehet në mosvotim.
Ramush Haradinaj
Ramushin e shikova vetëm disa minuta, sepse ai në Europë nuk do të mund të fitonte më shumë se 2%, por vetëm në Ballkanin Perëndimor.
Bedri Hamza
Hamza gjendet në hijen e Thaçit, Veselit dhe Memli Krasniqit. Ky i fundit ia ka mundësuar kandidimin, vetëm për të mos humbur vetë. As Hamza nuk flet kundër Prokurorisë, e cila sillet si një qendër mafioze. Qëndron mbi shtetin. Në fakt, Prokuroria dhe Gjykatat e Kosovës po dëmtojnë shtetin dhe ndërtimin e tij, njësoj si deri para pak kohe administrata paralele serbe në Kosovë.
Prokuroria e Kosovës nuk e njeh shtetin e Kosovës dhe nuk zbaton ligjet e tij. Ajo paguhet nga qytetarët e Kosovës, por është në shërbim të klaneve të PDK-së, LDK-së dhe AAK-së.
Përfundimi
Abdixhiku dhe Hamza kanë premtuar shumë investime, por jo ndërtimin e shtetit ligjor. Kurti premton edhe shtet ligjor, edhe investime, por shteti ligjor nuk mund të ndërtohet me një Prokurori që funksionon si antishtet.
Kush duhet të votohet? Qytetari le të vendosë vetë se cili e meriton votën e tij. Sot ai e ka këtë mundësi.
Vota është një e drejtë elementare e çdo qytetari, dhe kushdo që shan ata që votojnë sipas bindjeve të tyre propagandon një rend komunist dhe eliminimin e lirive dhe të drejtave të njeriut.
Ata që e shajnë Kurtin si komunist apo stalinist vetëm tregojnë se nuk kanë argumente. Se nuk shohin dështime konkrete dhe, për këtë arsye, u duhet një etiketim nga Korea e Veriut. Me këto sharje, ata në fakt po dëshmojnë se Kurti nuk ka bërë gabime të të mëdha.
A po tuten nga sekuestrimi i pasurisë së plaçkitur? Nuk e di. Por mund të jenë edhe të detyruar ta sulmojnë si një lloj mirënjohjeje për pozitat që u janë dhënë—ose për ato që i presin nëse fiton opozita.
P.S.�
Kur e kritikoja Kurtin, isha i detyruar të bllokoja shumë militantë të VV-së për shkak të kërcënimeve dhe ofendimeve. Dy javët e fundit, shumë militantë të LDK-së kanë treguar të njëjtën sjellje—duke u marrë kryesisht me deklaratat e Kurtit si opozitar, jo si Kryeministër.
Ata as fantazi nuk kanë dhe e shajnë vazhdimisht si komunist. Madje, më janë dërguar mbi 20 video të manipuluara, ku ai paraqitet sikur është në shërbim të Serbisë.
Disa ende nuk kuptojnë se një njeri i lirë vlerëson veprimet dhe aktet e politikanëve, pa pranuar askënd si tutor mbi vetveten. Ata ose nuk e kuptojnë këtë, ose nuk duan ta kuptojnë—sepse nuk u konvenon. Sepse mund të humbasin shumë.
Militantët e një partie e kanë trurin e kolonizuar dhe nuk shohin qartë—te partia e tyre i çmojnë edhe gabimet e mëdha, ndërsa te kundërshtari zmadhojnë edhe gabimet më të vogla.
Këta, gjoja nga dashuria për atdheun, luftojnë vetë bazën e demokracisë dhe propagandojnë një sistem komunist, duke u përpjekur të ndalojnë lirinë e mendimit dhe shprehjes.
Do t’i bllokoj deri në të fundit, sepse nuk kam kohë të merrem me risocializimin e tyre. Nuk heq dorë nga rendi demokratik, liria dhe të drejtat e njeriut, për të pranuar rendin komunist të tyre…
Nuk po mundem te shkruaj gjate sepse me kane kapur ethet e zgjedhjeve…
Albini shanë Kushtetuesen, Prokukorine, Gjykaten. Thot se eshte e kapur. Duket qe ai nuk do qe ta pranoje se ishte pikerisht Kushtetuesja qe e pruri ne pushtet Kurtin. Pra ishte Kushtetuesja qe e rrezoi qeverine e z. Hoti . E ai vazhdon qe edhe sot ta shaje ate. Ai perdore standarde te dyfishta; Kushtetuesja eshte e keqe kur eshte kunder Kurtit dhe eshte e mire kur eshte pro Kurtit.
Per sonte kaq. Shpresoj qe neser do te zgjohemi me lajmin e mire qe VV nuk fitoi me shume se 35% te votave. D o te ishte fat per qytetaret e Kosoves.