Prishtinë, 17 shkurt 2025
Të dashur qytetarë,
Të nderuara zëvendëskryeministre, ministra dhe zëvendësministra të Qeverisë së Republikës së Kosovës,
Të nderuar gazetarë,
Të nderuar kolegë të tjerë nga Qeveria e Republikës së Kosovës, nga administrata jonë këtu,
Urime 17-vjetori i Pavarësisë. Teksa festojmë, kujtojmë me krenari rrugëtimin tonë të gjatë drejt lirisë dhe pavarësisë.
Kushtetuta jonë vërtetë është e re, por kultura jonë është ajo e një populli të lashtë e autokton, e rrënjosur thellë në historinë tonë të lavdishme.
Ne sot nderojmë të gjithë ata të cilët sakrifikuan e u flijuan për lirinë tonë. Nga heronjtë, dëshmorët e martirët që dhanë jetën e tyre, te invalidët dhe veteranët e Ushtrisë Çlirimtare të Kosovës, te veprimtarët dhe mbarë qytetarët që qëndruan të palëkundur përballë sfidave, që të gjithëve u jemi mirënjohës për përkushtimin dhe kontributin e tyre.
Liria për të cilën kemi sakrifikuar kaq shumë, kërkon demokraci e cila mundëson që të dëgjohet zëri i popullit dhe të mbrohen të drejtat e qytetarëve. E demokracia, nga ana tjetër, kërkon institucione të forta—institucione që mbrojnë sundimin e ligjit, garantojnë zgjedhje të lira dhe të ndershme dhe sigurojnë që pushteti ju shërben qytetarëve. Pa institucione që garantojnë të drejtat e njeriut, të pakicave dhe ato civile, drejtësinë, transparencën dhe llogaridhënien, demokracia mbetet veçse një ide.
Republika jonë sot është më e fortë dhe më vitale se kurrë më parë, jo vetëm sepse kemi investuar në siguri dhe në mbrojtje, por sepse kemi forcuar institucionet demokratike dhe kemi normalizuar funksionimin e tyre që t’i shërbejnë para se gjithash, e mbi të gjitha qytetarëve të Republikës.
Ekonomia po rritet vit pas viti, shpejt e qëndrueshëm. Nga solidarizimi i qytetarëve për shtet, kemi ndërtuar shtet solidar për qytetarët. Me pasaportën e Republikës udhëtojmë lirshëm pa viza e me dinjitet në 38 shtete. Vendi ynë është në mesin e vendeve me indeksin më të lartë të rendit dhe ligjit dhe ndër vendet më të sigurta në botë për të ecur vetëm rrugës. Sipas indekseve ndërkombëtare për demokraci zgjedhore dhe liberale, Kosova është demokracia me përmirësimin më të madh në Ballkanin Perëndimor në katër vitet e fundit. Gjithashtu, Kosova jonë prinë në Ballkanin Perëndimor sa i përket përmirësimit të të drejtave politike dhe lirive civile, e në vitet e fundit kemi shënuar përmirësimin më të madh në indeksin e perceptimit të korrupsionit nga gjashtë vendet e Ballkanit Perëndimor.
Këto rezultate dhe arritje janë dëshmi e progresit tonë, të përbashkët, por gjithashtu edhe të progresit tonë të pandalshëm, të popullit, të institucioneve si dhe të miqve e partnerëve tanë evropianë e amerikanë. Arritje që i festojmë sot, e duhet t’i mbrojmë çdo ditë, të gjithë.
Suksesi ynë është dëshmi që kemi punuar në përputhje me amanetin e idealet e dëshmorëve të kombit, dhe në përputhje me të drejtat e popullit, dëshirat e rinisë dhe ëndrrat e fëmijëve.
Urime e gëzuar Ditën e Pavarësisë. Rroftë Republika jonë!
