Nga: Zeqir Bekolli , Prishtinë
Serbia duke përdorë si marioneta kriminelët serbë në Veri të Republikës së Kosovës, qysh herët ka hartuar planin për krijimin e një “Republike Serbe” në Kosovë, e cila do të ishte edhe bazë e interesave ruse, sikur që ndodhi me “Republikën Serbe” në Bosnjë. Një vëzhgim i vëmendshëm i realitetit të krijuar në atë pjesë të vendit tonë dhe një nënçmim i situatës nga qeveritë tona, ka bërë që gjërat të shkojnë deri në atë pikë, që u shpërfaqen këtyre ditëve, nga një agresion serb i kamufluar në emër të një “revolte” të serbëve lokalë.
Numri i njerëzve të uniformuar, dhe llojet e armatimeve me të cilat kanë disponuar
dëshmojnë qartë për formacionin ushtarak të krijuar dhe të stërvitur për luftë, ballë për ballë me forcat tona të rendit. Incidenti te ura në fshatin Banjska dhe humbja e jetës së eprorit Afrim Bynjakut e plagosja e dy policëve të Kosovës, ishte shkas për fillimin e konfliktit të armatosur, me synimin për krijimin e një territori të lirë, për një “Republike Serbe” në Veri.
Pastaj, zbarkimi në Manastirin e Bajskes, jo që nuk ka qenë i rastësishëm , por i planifikuar mirë, për të shërbyer si bazë për armatim e furnizim me armë e ushqime. Në rast të zgjatjes së luftimeve, Beogradi ka llogaritur se forcat ndërkombëtare do të futeshin ndërmjet palëve në dyluftim, kurse Serbia më pastaj do të zgjeronte numrin e ushtarëve dhe masën e armëve për të mbrojtur ato hapsira, deri te një Konferencë ndërkombëtare, ku do të vendosej për coptimin e Kosovës.
Mirëpo, vigjilenca, guximi dhe profesionalizmi i Policisë së Kosovës, por edhe delli diplomatik i saj, bën që strukturat terroriste të krijuara në Beograd, t’i shpartallojnë, e të ndiqen nga terreni, pa pasoja të mëdha për të dyja palët.
Ky sukses i Policisë së Kosovës dhe i përkrahur nga faktori ndërkombëtar, është dëshmia më e mirë për komunitetin ndërkombëtar, por edhe për publikun e brendshëm, se synimi i Serbisë ishte dhe mbetet territori i Kosovës dhe jo interesat e serbëve lokalë.
Duhet thënë hapur, se rasti është edhe një goditje për Serbinë dhe fundi i gënjeshtrave për diplomacinë e saj , për gjoja angazhimin e saj për pozitën e “vështirë” të pakicës serbe në Kosovë.
Pos kësaj, është edhe dëshmi tjetër se problemet në Kosovë nuk mund të zgjidhen me dhunë, e aq ma parë me përzierje të Beogradit.
Është kohë e fundit, për serbët në vendin tonë, të integrohen në institucionet e vendit dhe të gjitha dilemat t’i zgjidhin brenda tyre, nëse vërtetë dëshirojnë të jetojnë të qetë e të lirë në Kosovë.
Përzierja e Beogradit, siç është parë deri tash, e siç u dëshmua edhe ditëve të fundit, veç krijon çrregullime dhe ua vështirëson jetën serbëve .
