Ekspozitë për Nënë Terezën në sheshin me emrin e saj sot në Prishtinë, organizuar nga “Organizata Shqiptaria”, në bashkëpunim me shoqatën “Artistët për Artist”
Sot, më 26 gusht 2024, në sheshin Nënë Tereza në Prishtinë, ‘Organizata Shqiptaria’, në bashkëpunim me shoqatën ‘Artistët për Artist’, organizoi një ekspozitë të veçantë kushtuar Shënjtores Nënë Tereza, për të nderuar ditëlindjen e saj.
Ekspozita kishte si qëllim përjetësimin e figurës së Nënë Terezës në artin pamor, duke theksuar rëndësinë e saj në pesë aspekte kyçe:
1. Ruajtja e Trashëgimisë: Përmes artit pamor, kujtesa dhe vepra e Nënë Terezës ruhen për brezat e ardhshëm. Piktura, skulptura dhe forma të tjera të artit pamor u përdorën për të mbajtur gjallë kontributet e saj humanitare dhe shpirtërore.
2. Frymëzim dhe Edukim: Figurën e Nënë Terezës, artistët e përdorën si një burim frymëzimi dhe edukimi për publikun, duke nxjerrë në pah vlerat e dashurisë, përkushtimit dhe shërbimit ndaj të varfërve dhe të sëmurëve.
3. Simbol i Humanizmit: Nënë Tereza u paraqit si një simbol i humanizmit dhe dhembshurisë, duke krijuar imazhe që kapin thelbin e misionit të saj, të cilat shërbejnë si një model për të gjithë.
4. Promovimi i Identitetit Kombëtar: Si një nga figurat më të njohura ndërkombëtarisht me origjinë shqiptare, përjetësimi i saj në artin pamor ndihmon në forcimin e identitetit kombëtar dhe krenarisë kulturore të shqiptarëve.
5. Ndikimi Global: Me ndikimin e saj në mbarë botën, përjetësimi i Nënë Terezës në artin pamor përçon mesazhin dhe ndikimin e saj në një nivel global, duke tejkaluar kufijtë kulturorë dhe gjuhësorë.
Kjo ekspozitë dëshmon për rëndësinë e Nënë Terezës dhe trashëgimisë së saj, duke e ruajtur atë të gjallë në mendjet dhe zemrat e njerëzve, përmes fuqisë së artit.
Shoqatat “Organizata Shqiptaria” dhe “Artistët për Artistë”, si dhe Instituti i Trashëgimisë Shpirtërore e Kulturore të Shqiptarëve të Shkupit kanë hapur një ekspozitë të veçantë dhe kanë organizuar manifestim tradicional, në nder të ditëlindjes së shenjtores “Nënë Tereza”.
Këto organizime u mbajtën në sheshin “Nëna Terezë”, të cilat qëllim kishin kujtimin dhe kontributin e saj për popullin shqiptarë.
Kryetari i organizatës “ Artistët për Artistë”, Veton Gusia ka thënë për KosovaPress se populli shqiptarë duhet të ketë humanizmin e tij dhe atë ta ndaj me njëri-tjetrin, familjen, kombin e shtetin.
Ndërsa përfaqësuesi i shoqatës “Organizata Shqiptaria”, Basri Beka ka shtuar se trashëgimia e figurave të rëndësishme duhet të ruhet për brezat e ardhshëm.
Kurse, Don Lush Gjergji nga Ipeshkvia e Kosovës, ka thënë se përmes kontributit të Nënë Terezës, bota po e sheh ndryshe popullin shqiptar.
Ndërkaq, sonte Ipeshkëvia Prizren-Prishtinë në bashkëpunim me Institutin e Trashëgimisë Shpirtërore e Kulturore të Shqiptarëve-Shkup, organizon Akademi Solemne me rastin e ditëlindjes së Shën Nënë Terezës me të cilën hap “Ditët e Nënë Terezës”, që zgjasin deri më 5 shtator.
