Nuhi Bytyçi, Prishtinë
Filmi dokumentar “Mbijtesa dhe shkolla”, me skenar e producent Nuhi Bytyçi, me regji të Ilir Kabashit dhe drejtor fotografie Bekim Qyqalla, do të prezantohet edhe në kuadër të DEA Open Air Internacional Film Festival që mbahet nga 15 – 19 tetor të këtij viti në Tiranë. Ky projekt filmik i realizuar pas punës intensive më se 2 vjeçare të ekipit profesionist të Kompanisë filmike “IDEA” në Prishtinë dhe që është mbështetur nga Qendra Kinematografike e Kosovës dhe Komuna e Prishtinës, nga organizatori i Festivalit është paraparë që të shfaqet të shtunën më 16 tetor në orën 11:00 në ambientet e Universitetit të arteve në kryeqytetin shqiptar në Tiranë.
Të përkujtojmë se filmi “Mbijetesa dhe shkolla” deri tani ka marrë pjesë me sukses në 21 festivale me renome ndërkombëtare të filmit dokumentar. Në një konkurrencë të madhe ndërkombëtare, filmi është vlerësuar lartë nga juritë profesionale të festivaleve të filmave dokumentarë në vende të ndryshme të botës, ku ka marrë 11 çmimin e parë, duke u shpallur filmi më i mirë dokumentar i metrazhit të shkurtër.
Gjatë muajve të ardhshëm ky film do të prezantohet edhe në disa festivale të njohura në mbarë botën.
