- Një URIM më ndryshe për Dardaninë tonë.
Mjerisht, për fatin e pa sigurt, që kohët e fundit, është vënë në pikëpyetje të madhe, veçanërisht nga opozita renegate,edhe pa dëshirën time, më duhet ta përsërisë serish pyetjen e para katër viteve, se ne si popull, kemi më tepër arsye të qajmë apo festojmë për Kosovën edhe me rastin e 15 vjetorit të shtetësisë së brishtë të saj.
Me gjithë atë dhe përkundër brengës së thellë për fatin tënd të rrezikuar më seriozisht se kurrë më parë, që nga shpallja e pavarësisë, i armatosur fort me shpresën e madhe në zemër, ende të pa shuar krejtësisht, se megjithatë, ky nuk do të jetë përvjetori yt i fundit, që ti-do festosh dhe figurosh edhe në të ardhmen, në hartën gjeografike e politike të shteteve të pavarura, e tërë dhe e pa ndarë, Kosova ime e dashur- Urime nga thellësia e zemrës 15 vjetorin e Pavarësisë tënde!
Historia na mëson se edhe në vitet më të rënda për vendin dhe kombin tonë, ishim popull me fat të madh, pasi që Dardania jonë nxori edhe heronj si Isa Buletini,i cili qysh në vitin 1913 të shekullit të kaluar, para diplomatëve të Fuqive të Mëdha, kishte guximin të deklaronte me krenari: “Unë jam mirë, kur është mirë Shqipëria”!
E si për koincidencë, fatkeqësia jonë e madhe, aktualisht qëndron në faktin se 110 vite pas atyre ngjarjeve dramatike për Kosovën dhe mbarë kombin, tani Kosova nuk rrezikohet më vetëm nga ndërkombëtarët, por piksëpari nga tradhtitë e kuislingut Hashim Thaçi dhe renegatit jugokomunist Isa Mustafa, të cilët pa fije turpi, nënshkruan krijimin e ngrehinave kurrë të paqena serbosllave, në këto troje, si “zajednica” kundërkushtetuese serbe, duke shkelur rëndë kushtetutën dhe ligjet e shtetit të Kosovës.
Madje sikur mos të mjaftonte vetëm kjo, Kosova tani rrezikohet më seriozisht se kurrë më parë edhe nga partitë e dyshimta opozitare dhe pasardhësit e Thaçit e të Mustafës, që me krejt elanin i janë bashkuar luftës së nisur nga Serbia, për bosnjëzimin dhe ndarjen e vendit tonë edhe ashtu shumë të vogël madje më i vogli në rajon, si hap paraprijës për ricopëtimin përfundimtar të Kosovës, dhe shuarjen e shtetësisë tonë.
Parti që për më tepër se një shekull më vonë, dëshmojnë publikisht, se jo vetëm që mbeten të mbërthyera për fyti me shantazhe, apo edhe të blera nga Vuçiqi, por janë në gjendje ta shesin e zhbëjnë edhe shtetin tonë të pavarur, të arritur me aq shumë mund e vuajtje biblike dhe përpjekje shekullore të disa brezave, për të qenë në pushtet vetëm ato për vete duke rrezikuar edhe Republikën e Kosovës.
Për aq më keq, avazi i tyre aventuresk për ndarjen dhe ricopëtimin e Republikës së Kosovës, ka marrë hov aq të pafrenueshëm, sa që mu në prag të 15 vjetorit të pavarësisë së shtetit tonë të lirë, kurdo që flitet për Kosovën, ato në tavolinë, mbajnë gjithmonë bosnjëzimin me “republika srpska” dhe gërshërët e ndarjes e riserbizimit të Kosovës me ngrehina të shpifura serbe, si opsion të parë, për të pasuar, vetëm pak kohë më vonë, me ndarjen e jashtme dhe shuarjen e shtetësisë tonë!
Madje me aventurën vdekjeprurëse të opozitës renegate, për serbizimin e Kosovës, me bosnjëzim e “republika serbe” dhe vrasjen përfundimtare të kulturës, traditës, historisë dhe gjithë ekzistencës shekullore shqiptare shtetit të Kosovës, shkon aq larg sa që pas krijimit të “zajednicës”, të nënshkruar nga kuislingët Thaçi & Mustafa, në emër të planit franko-gjerman, serbizimi i tokave tona autoktone, do të AVANCOJË me eksterritorialitetin e kishave të serbizuara, akt pas të cilit, përveç kishave ortodokse “serbe” dhe xhamive turko-arabe, nuk do të ngelet më dukje as pamje e ekzistencës dhe vazhdimësisë shekullore të shqiptarizmës në këto troje.
Kurse menjëherë pas krijimit të “zajednicës” kundërkushtetuese një etnike serbe dhe zyrtarizmit të eksterritorialitetit të kishave “serbe”, në mënyrë të pa shmangshme, do të kërkohet lidhja direkte, me rrugë të veçanta dhe hapësira të gjera tokësore e eksterritorialiteteve të kishave dhe komunave nën sundimin e “zajednicës”, akt që shtetin e sotëm të pavarur të Kosovës do ta kthente në një Enklavë, të Serbisë hegjemoniste të “pushtuar” nga shqiptarët, riokupimi i të cilës nga Serbia, do të ishte vetëm çështje kohe!
Dhe përkundër faktit që edhe vet Presidenti i Shteteve të Bashkuara të Amerikës z.Joe Biden në letrën e dërguar Aleksandër Vuçiqit, kërkonte eksplicit nga Serbia, njohjen e Kosovës shtet të pavarur e sovran në tërësinë e saj territoriale,me kurorëzimin e marrëveshjes historike të pranimit të ndërsjellë të të dy vendeve, e cila do të vendoste paqen e përhershme në rajon, me tendencën e sëmur arriviste të opozitës së shitur për krijimin e “zajednicës”, dhe eksterritorialitetin e kishave “serbe”, që do të përfshinin hapësira tejet të mëdha të tokave tona, përveç figurimit në preambulën e kushtetutës së Serbisë, Kosova tanimë edhe ndërkombëtarisht, do të konsiderohej, madje në mënyrë zyrtare, si tokë serbe dhe as që do të parashtrohej më nevoja, për njohjen e pavarësisë së shtetit tonë nga Serbia!
Prandaj me gjithë dëshirën e madhe, që si në çdo përvjetor tjetër edhe në këtë vit, veçanërisht të frikshëm e të pasigurt, t`ia urojë vendit tim, ende të lirë dhe të tërë, 15 vjetorin e pavarësisë, frika nga aventurat tradhtare të kastës së kriminalizuar politike në opozitë dhe udhëheqësit e shitur e mafioz, të cilët e kanë sjellë gjendjen deri në atë shkallë, sa që ne si qytetarë që vërtetë e duam me gjithë zemër pavarësinë dhe shtetin tonë të lirë, nga rreziku real i ndarjes dhe bosnjëzimit, me të cilën opozita e tërbuar kuislinge, pareshtur, po na rri mbi krye, të mos dimë më, nëse më parë, po detyrohemi të qajmë, apo të marrim guximin të festojmë në këtë ditë të shënuar e të shumëpritur, madje të ëndërruar tepër gjatë për Kosovën tonë shtet të lirë e të pavarur!
Kështu që, në vend të urimit vetëm për pavarësinë, me rastin e 15 vjetorit të Kosovës shtet, kërkojë eksplicit nga kryeministri AlbinKurti, që para se ta pranojë birësimin e kopilit të opozitës si “zajednica”, të lindur kundërligjshëm dhe lënë qëllimshëm në derë të Kosovës,për dëmtimin e saj maksimal nga binomi Thaçi & Mustafa, si problem të pariparueshëm të kthyer tanimë edhe në imponim “ndërkombëtar”, në rastin më të keq, të pamundësisë për rrugëdalje, me reciprocitet të plotë, për minoritetet analoge, në të dy vendet, të jap dorëheqje të parevokueshme dhe nga opozita, bashkë me popullin e Kosovës, ta luftojë nga rruga dhe sheshet e gjithë vendit, krijimin e “zajednicës”, idealit të PDK-së dhe LDK-së, kësaj katrahure të pashembullt të tradhtisë kuislinge, në mënyrë që të shpëtohet shteti ynë i vogël, avancohet pavarësia e vendit tonë dhe të vazhdojë shtetësia e Republikës së Kosovës me hapa më të sigurt, drejtë integrimit me të drejta të plota, si shtet i pavarur në të gjitha organizatat e rëndësishme ndërkombëtare dhe OKB!
Ndërsa Dardanisë time të dashur, me gjithë brengën e thellë mbarëpopullore për fatin e rëndë që e ka pllakosur nga pasojat e tradhtive të kuislingve shqipfolës, me shpresën e pashuar, se ky nuk do të jetë përvjetori yt i fundit, si e tërë dhe e pa ndarë, ty dhe gjithë qytetarëve të shtetit tim, ju urojë nga thellësia e zemrës Pavarësinë!
