In Memoriam: Hysen Gega

Në verën e vitit 1978 rastisi ta njoh Hysen Gegën.

Si student në universitetin RUHR në Bochum (Gjermani), gjatë vere kisha të drejtë pune (meqë atëherë lejen e qëndrimit në Gjermani e kisha për „qëllime të studimeve“). Shkova për të punuar të dhëndrri Ramush Kastrati (Dobordol i Pejës), i cili ishte i punësuar në një kantier për përpunim të mermerit, në qytetin Plochingen. Aty erdh në vizitë Hyseni, meqë jetonte në afërsi (Esslingen). Ai praktikonte vizitimin e bashkatdhetarëtve, emigrantë ekonomikë, të cilët i furnizonte me material propagandist nga Shqipëria dhe u fliste për nevoja të angazhimit patriotik.

Në ndërkohë Hyseni u angazhua në Grupi Komunist „Zëri i Kosovës“, të cilin e pat formuar Riza Salihu (me epiqëndër në Shtutgart). Kjo nuk e pat penguar Hysenin të bashkangazhohej që ta shpërndanim fletushkën „Bashkimi“, të cilën e quanim organi i Frontit të Kuq Popullor (themeluar bashkë me Xhevat Ramabajen, Idriz Bajren, Besim Rexhën, në Buchum në korrik 1978). Pothuajse në secilën fundjavë, me auto e shpënzime të Hysenit, e shpërndanim „Bashkimin“ dhe ca trakte e materiale të tjera propagandistike. Ai i dinte ku janë konviktet dhe barakat e firmave gjermane, ku banonin edhe punëtorët nga Kosova.

Në një fundjavë nga fundi i viti 1978 shkuam në Zvicër, që ta shpërndanim atë material propagandistik. Në Bahnhof (stacion treni) në Cyrih, gjatë asaj veprimtarie, rastisi t’i njohim, aty e tutje Bashkëveprimtarët Rexhep Halimi (i anës së Shterpcës), Hasan Kadriu (i Preshëvës) dhe të tjerë.

Në fund të dhjetorit 1979, Hyseni, Maksut Saramati, unë, kemi vizituar Jusuf Gërvallën e sapoardhur në Gjermani. Vizita ndodhi në zyrën e Arbeiterwohlfahrt’it në Ludwigsburg, ku ishte i angazhuar Bardhosh Gërvalla, si punëtor social.

Në fund të dhjetorit 1980 Sadik Blaka ia mbush mendjen Hysen Gegës që të rrugëtojnë bashkë në Kosovë – për të bërë aksione çlirimtare. Pollogasi Ramadan Ramadani (Babai i Basshkëveprimtarit Nami), i vozit me kombi të tij, pa qenë i informuar për rrezikun që mund t’i ndodhte, nëse do të hetohej nga policia jugosllave. Ai gjithashtu nuk dinte për materialin propagandistik që Hyseni dhe Namiu e kishin fshehur në kombi. Deri në Kosovë rrugëtojnë pa telashe…

Fatkeqësisht në Natën e Vitit të Ri 1981 policia e KSA të Kosovës e burgosin në shtëpinë e tij në Sallagrazhdë. Për veprimtarinë e deriatëhershme çlirimtare e denojnë 12 vite burg.

Sërish, edhe në vitet e „pluralizmit rugovist“, Hysenin e burgosin dhe e dënojnë (për këto shihni bashkëbisedimin e përgatitur dhe emetuar nga RTK, më 12.02.201).

Edhe pse goxha në moshë të thell, qysh në aksionet e para guerile të UÇK-së në Rrethin e Suharekës, Hyseni shquhet për guxim dhe taktikë guerile.

– Ngushëllime familjarëve, bashkëveprimtarëve e bashkëluftetarëve!

– I përjetshëm kujtimi dhe respekti për Hysen Gegën!

***

Njoftim për ceremoninë e vorrimit, 29.07.2021:

– Në ora 15:00, mbledhje komomerative në shtëpinë e kultures në

Suharekë

– Në ora 16:00, homazhe tek Sheshi i Lirisë në Sallagrazhdë dhe

– Në ora 17:00, ceremonia e vorrimit tek varrezat e fshatit

Sallagrazhdë.

***

Ata që duan të njihen me modestinë dhe virtytët fisnike, humanitare, patriotike, çlirimtare, të Veprimtarit veteran Hysen Gega, i këshilloj ta përcjellin bashkëbisedimin 19-minutësh, të përgatitur e emetuar nga RTK: