Kryeministri i Kosovës, Albin Kurti e ka vizituar fondacionin humanitar “Freskia” në Prishtinë që udhëhiqet nga hoxha Husamedin Abazi, i cili ka histori të errët me organizatën “AKEA”, e mbyllur nga shteti me dyshimet se ishte e përfshirë në rekrutimin e xhihadistëve shqiptarë që luftuan në Siri e Irak.
Shteti i Kosovës në vitin 2014 kishte mbyllur organizatën AKEA, e cila gjithashtu dyshohej se ishte e lidhur me lëvizjen politike islamike “Vëllazëria Myslimane” që ishte marrë pushtetin në Egjipt gjatë Pranverës Arabe të vitit 2011.
Mirëpo kryeministri i Kosovës, ka harruar të kaluarën e Husamedin Abazit, madje, nga ai, mori edhe një komplet të librave të atdhetarit shqiptar, Sami Frashëri.
“Në muret e fondacionit humanitar “Freskia” në Prishtinë, gjendet mbishkrimi “Mos më ushqe me peshk, por ma mëso peshkimin”. Ky fondacion ofron trajnime dhe kurse për nëna vetushqyese të cilat aftësohen për tregun e punës. Pastiçeria dhe rrobaqepësia janë dy nga sektorët e aftësimit, e të hyrat nga shitjet mbesin në dobi të nënave vetushqyese”, ka thënë ai.
Hoxha Abazi në vitin 2021 kishte reaguar në Facebook, duke thënë se AKEA-s në vitin 2019 i ishte hequr pezullimi dhe se asnjëherë nuk ishte mbyllur.
Historia e errët e AKEA-s
AKEA, e njohur më parë edhe si “Urtësia” është në shoqatë e financuar jozyrtarisht nga Husamedin Abazi. Në vitin 1997 ai ishte student në Rijad për Studime Islame.
Shoqata u formua zyrtarisht në vitin 1999. AKEA edhe më parë ishte mbyllur nga UNMIK-u në Kosovë pas ngjarjeve të 11 Shtatorit për shkak të lidhjeve të saj me Al Kaedën dhe mbështetjes së marrë nga sauditët.
Në rastin e Turqisë, ajo dyshohet se është mbështetur nga Fondacioni i Ndihmës Humanitare (IHH).
Qeveria turke ka lidhur kontaktet me anëtarët e AKEA-s në mars të vitit 1999.
Grupi u ndalua të hyjë në territorin e Maqedonisë së Veriut dhe u detyrua të kthehej mbrapsht në Stamboll.
Aty u strehua në kampet e ngritura prej IHH-së, ndërsa vizitohej shpesh nga lideri Abazi dhe miq nga Egjipti.
Autoritetet e sigurisë kanë ndjekur nga shumë afër aktivitetin e këtij grupi duke ndërhyrë dhe sekuestruar kompjuterët.
Më pas, ata u transferuan në Shqipëri nën koordinimin e një shoqate civile, që ka rol të rëndësishëm në formësimin e politikës së jashtme të qeverisë së sotme të Turqisë.
Duke mbledhur ndihma nëpërmjet të njëjtës shoqatë, ata hapën një shtëpi botuese “FOCUS A” pas luftës.
Ata organizuan aktivitete të ndryshme me shoqatën simotër “LOGOS” të administruar nga shqiptaro-maqedonasi Adnan Ismaili duke organizuar edhe kampe për të rinj, në të cilat merrte pjesë edhe ish-kryeministri i Turqisë, Ahmet Davutoglu.
