Nexhmije Mehmetaj
Lidhja e Arsimtarëve dhe Prindërve Shqiptarë “Naim Frashëri” në Zvicër të dielën më 14 nëntor në Kütingen të Kantonit Argaut, organizoi një festë të madhe në nderim të 30 vjetorit të shkollës shqipe të mësimit plotësues e cila mblodhi pedagog, mësues, prindër, nxënës, miq dhe bashkatdhetarë.
Në një ambient të zbukuruar me flamuj kombëtar dhe zviceran si dhe pankarta kushtuar 30 vjetorit të kësaj shkolle, përfaqësuesit pjesëmarrës të 14 kantoneve ku zhvillohet mësimi shqip, të shoqëruar nga tingujt e këngës shqipe, parakalimi i fëmijëve me rroba kombëtare, në orën 14.00 duartrokitjet e nxënësve të shkollës sonë hapën festën.
Emocione kishte sidomos nxënësja Janina Isufi që me përkushtim e deri në përsosmëri këndoi Himnin e flamurit. Më pas u interpretua edhe himni i Republikës së Kosovës.
Mikpritës i këtij evenimenti ishte Këshilli Kantonal i Argatut, nën kujdesin e veçantë të Riza Demaj – kryetar dhe zotit Adem Osmani.
Në festën e bukur, erdhën për të përgëzuar jubileun e shkollës shqipe disa personalitete të njohur nga Kosova si: Ministrja e Arsimit, Shkencës, Teknologjisë dhe Inovacionit, Arbërie Nagavci, prof. Meriman Braha ish koordinator i parë dhe themeluesi i Shkollave Shqipe të pavarura të mësimit plotësues në Zvicër dhe vende tjera më mërgatë si dhe Ambasadori i Republikës së Kosovës në Zvicër, Sami Ukell.
Me respekt e nderim figurave të shquara zvicerane që kanë mbështetur mësimdhënien e gjuhës shqipe të mësimit plotësues në forma të ndryshme, edhe me këtë rast prania e tyre na nderoi duke mbajtur edhe nga një fjalë rasti si: Zonja Michaela Brühlmeier zëvendës drejtoreshë e Arsimit në Kantonin Aargau, zoti Markus Truniger ish-udhëheqës i Sektorit të pedagogjisë ndërkulturore në Cyrih, zoti Fritz Weber – ish-ministër i Arsimit në kantonin e Glarusit, zonja Maya Hauser udhëheqëse e sektorit për arsim dhe kulturë në Glarus, zonja Carmen Suter, kryerare e komunës Suhr të Argaut.
Albanologu dhe pedagogu zviceran Prof. dr dr Basil Shader i cili së bashku me bashkëshorten e tij znj. Erica Bauhofer – Shader njëherit janë edhe anëtarë nderi të LAPSH-it. Kontributi i profesor Shaderit është një ndihmesë shumë çmuar në mbarëvajtjen e mësimdhënies së mësimit plotësues të gjuhës shqipe në Zvicër. Ai i pasionuar dhe tërë dinjitet foli për vlerat dhe rëndësinë që ka mësimi plotësues për fëmijët shqiptarë, për shqetësimet e mos përfshirjes së gjithë fëmijëve në mësimin plotësues duke theksuar “ Fajin e kanë autoritetet zvicerane që nuk e kanë futur mësimin e shqipes dhe gjuhëve tjera të komuniteteve me prejardhje të huaj në planet e financimit”. Kujtoi projektet që ka udhëhequr në përkrahje të mësimit shqip, qysh nga viti 1995 kur botoi tekstin e parë “Shqip” në bashkautorësi, pastaj projektin Tekstet shkollore (2008 2012) për fëmijët e diasporës shqiptare për tri nivelet (19 tekste) në bashkëpunim me MASH e Kosovës, projektin Doracak didaktik për mësimdhënës sipas 6 fushave didaktike, projekte për seminaret e shumta me mësimdhënës për ngritjen e cilësisë së mësimit shqip etj..
Ministrja Arbërie Nagavci ndër të tjera foli me mirënjohje dhe nderim për organizimin e LAPSH si bartës të mësimit shqip dhe përcolli një urim nga zemra për të gjithë mësueset/it, që lanë gjurmët e para në formimin dhe organizimin e mësimit shqip që me misionin e tyre fisnik lartësojnë çdo ditë e më shumë emrin e shqiptarëve në mërgim.
Kryetari i LAPSH Nexhat Maloku, mësues që nga themelimi, paraqiti për disa minuta historinë e organizimit të Shkollës shqipe nën drejtimin e Lidhjes së Arsimtarëve dhe Prindërve Shqiptarë, rrugën e vështirë e plotë sfida të shkollës shqipe, falënderoj drejtuesit e Këshillave Kantonale, mësuesit dhe mësueset, për punën e përkushtuar e me pasion në mësimdhënie si dhe rezultatet e arritura.
Prof. Dr.dr. Basil Shader
Zëra të gëzueshëm, vjersha, valle e këngë fëminore i dhanë hijeshi festës. Çaste solemne dhe mallëngjyese. Rreth 30 nxënës morën pjesë në programin shkollor festiv, në sytë e tyre rrezatonte dritë lumturie se recituan, vallëzuan, kënduan në gjuhën e tyre amtare. Të përgatitur nga stafi i mësuesve mjaftë të përkushtuar. Më të dalluarit padyshim ishin nxënësit e mësuese plotë zell e dashuri Ida Jashari, Bernë.
Festën e mbushën me ngjyra gëzimi Shoqëritë Kulturo Artistike si: SHKA “Dardania” që vepron në Winterthur, SHKA “Rilindja “ në Cyrih.
Pjesë e veçantë e programit ishte promovimi i Librit jubilar “30 vjet shkolla shqipe e mësimit plotësues në Zvicër (1990- 2020).
LAPSH është një vlerë që ka arritur në saje të përpjekjeve të palodhura të anëtarëve të saj të përkushtuar të krijojë historinë e shkollës shqipe të mësimit plotësues që nisi më 20 shtator 1990 në Kantonin Glarus për të hapur krahët tash e 30 vjet nëpër shumë kantone zvicerane.
Dëshira deri në përkushtim e mësuesve, pa njohje zyrtare nga ana e Ministrisë së Arsimit të Kosovës, pamarrëvesheje midis dy shteteve Kosovë – Zvicër për të u institucionalizuar mësimin shqip, për të ardhmen e tij lë shumë për të dëshiruar. Përballë heshtjes shtetërore aktualisht shkolla shqipe përballet me probleme mjaftë të mprehta.
Pjesa përmbyllëse e programit ishte dhënia e mirënjohjeve për veprimtarë dhe mësimdhënës të dalluar .
Programi është moderuar shumë bukur nga mësuesja Mirela Duka-Xoxi dhe Ramadan Morina.
Delemont, 16.11. 2021
