Nga: Lis Bukuroca
Zoti Kryeministër,
në vitin 1981, kur nisëm protestat studentore në Prishtinë dhe po luftonim për barazi në Jugosllavinë e atëhershme, shkruanim për ne gazetat perëndimore si “Frankfurter Allgemeine Zeitung”, “Corriere della Sera”, ”Le Figaro”, “Times”, “Le Monde”, etj., dhe ato shkrime na i lexonte shqip Radio Tirana. Dhe, na motivonte. Na jepte guxim. Si edhe “Zëri i Popullit.”
Mirëpo, asnjë qeveri perëndimore nuk brengosej për gjendjen tonë apo për diskriminimin që po përjetonim. Ata dëshironin një Jugosllavi të qetë. Me ardhjen e Millosheviqit, Serbia braktisi patriotizmin jugosllav dhe riktheu nacionalizmin serbomadh: të Akademisë Serbe. Ky fakt shqetësoi edhe Slloveninë, Kroacinë, Maqedoninë, Malin e Zi dhe Bosnjën.
Më pas, Serbia pezulloi autonominë e Kosovës dhe ne po burgoseshim masivisht, por bota na shikonte nga larg dhe vetëm aty-këtu shprehte ndonjë mospajtim formal. Sllobodan Milosheviqi, një ultra-nacionalist dhe luftënxitës, u përball me pacifistin e madh Ibrahim Rugova, i cili ishte i pari pacifist në historinë e Europës. Në fillim, ai nuk pati shumë mbështetje. Lutjet e tij në Vatikan, SHBA, Angli, Francë, Itali e Gjermani, fillimisht nuk sollën rezultate të prekshme, por ai me filozofinë e tij, po pranohej si përfaqësues i jonë. Ky ishte suksesi i parë dhe qysh nga shfaqja e tij, nuk do të pyetej më Serbia për gjendjen tonë.
Rugova nuk ia mori vetë aleatët Serbisë, por Millosheviqi, me qëndrimin e tij anti-perëndimor, ia dërgoi mjaftë aleatë Rugovës. Çfarë ndodhi më pas? SHBA, Perëndimi, nisi të zvogëlojë Serbinë dhe dominimin serb në Ballkan. Hap pas hapi, por me këmbëngulje.
Më 25 qershor 1991 Sllovenia shpalli pavarësinë. Pas një lufte të shkurtër dhjetëditore me forcat jugosllave të dominuar nga Serbia, pavarësia e Sllovenisë u njoh. Sot është në NATO.
Më 25 qershor 1991 Kroacia gjithashtu shpalli pavarësinë, por për shkak të luftës me forcat serbe dhe serbët etnikë brenda Kroacisë, njohja ndërkombëtare u bë më 15 janar 1992. Sot është në NATO. Në këtë mënyrë, ndikimit serb iu hoqën dy republika dhe iu zvogëlua edhe dalja në det.
Më 8 shtator 1991, SHBA zvogëloi akoma më shumë ndikimin serb në Ballkan dhe Maqedonia e Veriut shpalli pavarësinë. Sot është në NATO. Iu hoqën tri republika dhe ndikimi serb vazhdoi të dobësohej dhe zvogëlohej më tej.
Më 3 mars 1992 Bosnja dhe Hercegovina shpalli pavarësinë pas një referendumi të mbajtur në shkurt të atij viti. Për shkak të këtij akti, shpërtheu kryengritja e përgjakshme serbe në Bosnjë, e cila zgjati deri në vitin 1995. SHBA, Perëndimi ia hoqën në fund edhe Bosnjën ndikimit serb, duke e krijuar një Republikë Serbe, por pa lejuar ndarjen e saj.
Amerika dhe Perëndimi nuk u ndalën këtu në zvogëlimin e Serbisë, por vazhduan tutje. UÇK shfrytëzoi arritjet e Rugovës dhe pati sukses. Në vitin 1999, NATO bombardoi dhe dëboi armatën serbe nga Kosova.
Më 3 qershor 2006 Amerika e zvogëloi edhe më shumë Serbinë dhe pranoi pavarësinë e Malit të Zi. Sot është në NATO. Më pas, erdhi George Walker Bush, dhe e shpalli pavarësinë e Kosovës në Tiranë; një gjest simbolik i ngjashëm me shpalljen e pavarësisë së Shqipërisë nga Ismail Qemali në Vlorë.
Më 17 shkurt 2008, Serbia definitivisht u zvogëlua edhe më shumë dhe u pranua nga Perëndimi pavarësia e Kosovës. NATO gjendet në Kosovë. Sot Serbia nuk guxon të rrezikojë asnjë komb rreth vetes.
Tani, zoti Kryeministër, Amerika dhe Perëndimi dëshirojnë të shpërblejë serbet e Kosovës me një autonomi, ndoshta SHBA mendon se, meqë na ka ‘dhuruar’ një shtet, ka të drejtë t’i japë diçka edhe serbëve për të “mashtruar” Serbinë dhe për të vazhduar pa probleme me zvogëlimin e mëtutjeshëm të Rusisë. Rusia duhet të zvogëlohet zoti Kryeministër, prandaj Perëndimi nuk do krizë të re.
Adem Demaçi ishte kundër nënshkrimit të Marrëveshjes së Rambujesë. Sot kemi shtet. Dëshira për t’u bërë hero si Adem Demaçi apo Mic Sokol mund të jetë e lavdishme në letër, por dëmet për Kosovën do të jenë në vepër.
Çudia më e madhe është se ju tani shpresoni dhe prisni të fitoni kundër Amerikës, kundër Gjermanisë, Italisë, Francës dhe Anglisë si dhe kundër NATO-s. Shumë lider që kanë “pasur” dashuri të “madhe” ndaj atdheut, i kanë dëmtuar më së shumti atdhetë e tyre. Ju jeni duke ecur kokëlartë në këtë drejtim: i patrembur. Drejt murit apo duke u përgatitur për ta vënë gjoksin para topit.
Meqë Serbia, me Millosheviqin, ia dhuroi të gjithë aleatët Ibrahim Rugovës, ju tani ia kthyet të gjithë Serbisë, konkretisht Aleksandër Vuçiqit. Keni edhe pak shanse. Shfrytëzojini!
Perëndimi dhe NATO kanë bërë një punë të madhe në zvogëlimin e Serbisë dhe ndikimit serb në Ballkan dhe ajo sot është shumë më e dobët. Edhe nëse blen avionë, ajo nuk do të guxojë t’i përdorë kurrë në Ballkan. Avionët i duhen për të përgjumur popullin serb.
Dy shtete shqiptare janë tashmë faktorë të rëndësishëm në rajon. Gjendja e shqiptarëve në Maqedoninë e Veriut është përmirësuar, edhe pse ende ka sfida dhe nevojë përmirësimi. Po ashtu, situata në Luginën e Preshevës kërkon ndryshime, por proceset janë në lëvizje dhe rezultatet do të vijnë pas pajtimit shqiptaro-serb.
T’i japim serbëve atë që kërkojnë, konform Kushtetutës, duke i lejuar të gëzojnë lirinë e tyre në mënyrën që e dëshirojnë, dhe të mbajmë anën e drejtë të historisë. Nesër Lugina mund ta pretendojë pikërisht atë autonomi. Pajtimi me pakicën serbe dhe koordinimi absolut me Shtetet e Bashkuara të Amerikës, është fitore shqiptare. Ballkanike.
Kosova e ka firmosur Autonominë Serbe dhe e ka aprovuar Kuvendi. Takohu me amerikanët dhe serbët e Kosovës dhe nisni implementimin e asaj autonomie. Kërkoni nga SHBA dhe Europa garanci. Si pranim nga vendet tjera të BE-së dhe inkuadrim në NATO. Pas autonomisë, serbet të përfaqësohen në Kuvend me aq deputet sa e meritojnë sipas numrit të popullsisë. Ne kemi dashur liri dhe serbët le ta fitojnë për vete, në emër të paqes dhe të ardhmërisë së fëmijëve tanë. Kështu, ne do të ruanim aleancën e rëndësishme me SHBA-të, e cila është thelbësore për të ardhmen dhe për stabilitetin e rajonit.
Nëse vazhdoni të besoni se do të fitoni betejën kundër Quint-it, KFOR-it dhe NATO-s, atëherë askush nuk mund t’ju ndihmojë. Atëherë keni vendosur të bëheni “Mic Sokol” dhe të fitoni kundër topit! Kryeministër, ju i duheni vendit për ndërtimin e shtetit ligjor. Shpëtojeni Kosovën dhe vetveten!
Imazhi i gjeneruar me ideogram
Po me behet qejfi qe me ne fund edhe Ju e patë qe politika e jashtme e z. Kurti ishte shume e demshme per shtetesine e Kosoves.
Prej sot lirshem mund te them se Ju jeni ai i meparshmi, gjithmonë konstruktiv ne qendrimet tuaja.
I nderuemi Lis!
Lexova “Letrën” e juaj, dhe nga shkrimi veçova këtë pjesë, po citoj:
“Çudia më e madhe është se ju tani shpresoni dhe prisni të fitoni kundër Amerikës, kundër Gjermanisë, Italisë, Francës dhe Anglisë si dhe kundër NATO-s. Shumë lider që kanë “pasur” dashuri të “madhe” ndaj atdheut, i kanë dëmtuar më së shumti atdhetë e tyre. Ju jeni duke ecur kokëlartë në këtë drejtim: i patrembur. Drejt murit apo duke u përgatitur për ta vënë gjoksin para topit.”
Ju lumt për guximin,por a keni menduar se çfarë përgjigje do të merrshit nga Kryministri!?
Kurti nuk do bëhej Kryeminstër po mos të kishte fituar mbi 50% të votave. Të presim 9 shkurtin e 2025-ës, e mas po të vjen puna me e grisë letrën!? Tri gjëra nuk kanë kthim mbrapa: 1. Fjala e folur apo e shkruar; 2. Plumbi që del nga gryka e armës; 3. Koha.
Respekt!
Ismet M. Hasani, Suedi
P.S.
Komenti i parë nga Alberti mos t’ua rritë mendjen, nga se ai po e shiqon vetëm “letren” por po “harron” se: si në rast kur e lavdëron dikë, apo e përgjon tjetrin, ti e mban përgjegjësinë
Veçoj faktin e vitit 1981 e pak më tutje kur qeveritë perëndimore nuk brengoseshin për gjendjen e popullit shqiptar të kosovës që autori e anashkalon me dashje kur sot dihen faktet se ajo Tiranë me mediat si ” Zeri i popullit ” e stacioni televiziv i vetëm i shtetëror shqiptar duhej të punonte baraz si sistemi i Yugosllavisë së atëhershme , të hiqte vetburgosjen , izolimin , të ushqente popullin , të kishte lirinë e fjalës .Si për ironi në vitin 1980 e deri në falimentimin e atij sistemi shtypës e mashtrues populli ushqehej me triska , tollone i quajtën atëhere , fshatarsia ushqehesh me bukë misri e pa bagëti private .Pra ,ata qeveri perëndimore e dinin mirë gjendjen e popullit shqiptar të Shqipërisë e kurrë se si historia t”i tregonte si bashkëpunues me një diktator e diktaturën e tij . Është koha që këto fakte mos të fshihen . Pas heqjes së Autonomisë dhe masave reprezale ndaj shqiptarëve të Kosovës e drejta anoi 100 % për Kosovën. Me rrëzimin e Murit të Berlinit filluan të shemben të gjithë muret , themelet e shteteve simotra të B. Sovjetik.
Ky artikull paraqet një analizë të thellë historike dhe politike mbi zhvillimet në Ballkan, duke u fokusuar në çështjen e rëndësishme të Kosovës dhe marrëdhëniet ndërkombëtare të saj.
Artikulli ndjek një linjë historike të zhvillimeve në ish-Jugosllavi, duke treguar sesi Perëndimi dhe SHBA kanë zvogëluar ndikimin e Serbisë në Ballkan përmes mbështetjes ndaj shteteve të reja të krijuara.
Artikulli thekson rëndësinë e marrëdhënieve me SHBA dhe NATO-n si faktorë vendimtarë në krijimin dhe mbrojtjen e shtetit të Kosovës. Vërehet një paralajmërim që çdo distancim nga këta aleatë mund të jetë i rrezikshëm për stabilitetin e Kosovës.
Autori me të drejtë kritikon qasjen e Qeverisë aktuale të Kosovës ndaj Perëndimit dhe sugjeron se një qëndrim i tillë mund të sjellë pasoja të rënda për vendin. Përmendet nevoja për një qasje pragmatike dhe për zbatimin e marrëveshjeve të arritura.
Ndër të tjera nxit reflektim mbi sfidat dhe zgjedhjet strategjike që Kosova duhet të bëjë në një rajon, ku lidhen interesa të shumta gjeopolitike.
Me të drejt i bënë thirrje Kryeministrit të Kosovës për të ndërmarrë hapa konkretë në bashkëpunim me aleatët ndërkombëtarë, për të shmangur përplasjet dhe për të ruajtur të ardhmen e Kosovës.