Mendime për krijimtarinë e Tim Shkupit, tologut, poetit, shkrimtarit dhe disidentit shkupjan

Nga: Zekeria Idrizi, Berlin – Shkup

TIM SHKUPI – TEOLOG, POET, SHKRIMTAR DHE DISIDENT SHKUPJAN

Me Tim Shkupi -n, Musa Lamallarin – teolog, poet, publicist, shkrimtar dhe disident shkupjan.
Libri i tij “2001 – Fundi i botës” është bestseller, i cili shkaktoi jehonë të thellë te auditori lexues dhe mori vlerësime të larta te kritika letrare. Ndërkaq, libri tjetër i tij “Hyrje në fetë hyjnore” sot është në mesin e literaturës së domosdoshme studimore komparative nëpër universitete dhe në qarqe intelektuale e teologjike.
Tim Shkupi, me shkrimet dhe ligjërimet e tij po revolucionarizon shtresat e besimtarëve shqiptarë dhe po reformon mësimet, idenë dhe diskursin teologjik në trevat tona. Inovacionet, përkatësisht, zbulesat e tij studimore kur’anore po trondisin mendjet e mykura të hoxhallarëve dhe imamëve miopë e konservativë, veçanërisht të qarqeve fundamentaliste, tradicionaliste dhe, veçantë, shqiptarofobe, ndërkohë që po gëzojnë, freskojnë dhe pasurojnë mendjet atdhetare shqiptare.

Islami politik apo ai tradicional ?! Për Timin këto shprehje (sintagma) janë inekzistente, fiktive, të sajuara nga nomenklatura hoxheske e imameske, me doktrinat e tyre nga Bagdadi, Kairoja e Stambolli. Së këndejmi ai deklaron botërisht që nuk ekzistojnë nocionet (emërtimet) islam dhe mysliman në Kur’anin e shenjtë dhe vë në fokus të vëmendjes parullën programatike të Rilindjes Kombëtare dhe të Neo-shqiptarizmës:
“FEJA E SHQIPTARIT ËSHTË SHQIPTARIA”.
Rrjedhimisht, ai pohon zëshëm:
“UNË JAM SHQIPTAR”.

Ndërkaq nga thënjet e tij emblematike është:
“NË ILIRI/ARBËRI NUK KA ISLAMOFOBI, POR REALISHT KA SHQIPTAROFOBI!”
Sa i përket pyetjes se cilin drejtim duhet të ndjekim në religjion: atë vehabito-selefist, hanefit apo sufisto-mistik etj., Timi përgjigjet shkurt e shqip:
“HIQNI DORË NGA SEKTET DHE TARAFET GJITHËFARËSHE DHE NDIQNI ME PËRPIKMËRI MËSIMET DHE UDHËZIMET BURIMORE E AUTENTIKE TË TEKSTEVE TË KUR’ANIT TË SHENJTË!”

P.S. Natyrisht, unë e përkrahi fuqishëm në ligjërimet, interpretimet dhe bindjet e tij kombëtare dhe të besimit burimor, autentik muhamedan e ibrahimik (abrahamik).

Me Tim Shkupin njihemi qysh nga fëmijëria dhe, si fqinjë, vitet e nëntëdhjeta vetëm gjumi na ndante, duke u shoqëruar shpesh dhe duke diskutuar e debatuar për gjithçka rreth çështjes kombëtare dhe religjionit.

Përndryshe, Timi është edhe patriot i flaktë dhe veprimtar i madh i kauzës sonë kombëtare qysh si gjimnazist e deri në ditët e sotme… Ai kreu me sukses të shkëlqyer shkollën fillore në Shkup, medresenë Alaudin në Prishtinë dhe studimet në Universitetin Az’har në Kairo.

Përfundimisht, Tim Shkupi është tmerr (ankth në gjumë) për shqiptarofobët, fundamentalistët, arabofilët dhe neo-otomanët erdoganistë.

Ndërkaq, interpretimet dhe diskursi i tij revolucionar e progresist teologjik do lënë gjurmë të thella në analet e historisë shqiptare dhe në proveniencën e teologjisë jo vetëm muhamedane por edhe te besimet tjera, madje edhe te ateistët dhe agnostikët.

Miqësisht dhe idealisht:
Zekerija Idrizi, me 04.12.2023