Prokuroria e Gjykatës speciale në Hagë ka njoftuar se do të ketë 327 dëshmitarë në gjykimin e ish-komandantit të UÇK-së, Hashim Thaçi dhe tre të bashkakuzuarve të tjerë.

Sipas informacioneve të besueshme ndërkombëtare të gazetës “Bota sot”, shumica absolute e tyre janë shqiptarë, kryesisht prej tyre për viktimat e vrasjeve politike.

Pretendimet e ngritura nga Mero Baze, dhe kolegë të tjerë, më shumë bëhen për qëllime komerciale të tyre, dhe si pjesë e strategjisë mbrojtëse të të akuzuarve nga gjykata speciale.

Po ashtu këta ndodhen në këtë përpjekje, gazetarë si Mero Baze dhe të tjerë, meqë sot, në një mënyrë direkte apo indirekte janë pjesë e ekipit mbrojtës të Thaçit dhe të grupit të tij, për shkak se dikur ishin kontribuuesit apo kundërshtarët më të mëdhenj të Thaçit. Prandaj, tash janë më agresivë se të gjithë, madje se edhe familjarët e këtyre të arrestuarve.

Viktima të vendimeve të Thaçit janë shqiptarë

Madje Mero Baze në shkrimin e tij mbrojtës për Thaçin, nuk e thotë asnjë fjalë për vrasjet politike, përkundrazi mundohet ta paraqesë si një patriot të madh, që po viktimizohet nga Serbia, dhe në nëntekst nga shqiptarë të komprometuar.

Një kopje të listës që kishte 101 emra shqiptarësh në krye me Presidentin Rugova për tu likuiduar, e ka botuar gazeta “Rilindja” në Shqipëri. Në krye të saj ishte presidenti Ibrahim Rugova. Vetë Mero Baze, e ka ngritur në lartësitë më të mëdha Ibrahim Rugovën, si politikan, ndërsa ky ishte caku kryesor i sulmit të Hashim Thaçit dhe klanit të tij.

Në pamundësi të asgjësimit të tij si njeri dhe si politikan, u vranë shumë bashkëpunëtorë të Rugovës për vite të tëra, u keqtrajtuan, kërcënuan, shantazhuan, u përndoqën, u izoluan dhe madje u lanë pa bukë me vite!

Familja e kolonel Ahmet Krasniqit, e gazetarit Uka, familja e Ilir Konushecit, familja e Behajdin Hallaqit, familja Ramqaj, familja Maloku, familja Mustafa, familja Imeri, Kastrati, Dajaku, Manaj, Bytyçi, Rraci, Ajeti, Ukëhaxhaj (e Ademit), Popova, familja Zemaj, familja e komandant “Drinit” etj., atentatet si ndaj intelektualit të shquar Sabri Hamitit me plagosje të trefishtë nga “njeriu me leninkë”, pastaj ndaj Adem Salihajt, ndaj vëllezërve Geci në luftë e pas saj, … e deri tek familja Rugova, që mund të dëshmojë për kërcënimet që ua ka bërë Thaçi dhe grupi “ndërmarrja kriminale”, asnjë prej tyre nuk janë jo shqiptare dhe as nuk ishin njerëz të komprometuar nga regjimi i Serbisë.

Ndoshta ju Baze dhe të tjerët keni menduar se “gjaku mund të lahet me para”, dhe jeni mbështetës të kësaj vepre mbeturinë e sistemeve të komprometuara të drejtësisë së Mesjetës,

Sikurse që mund të dëshmojë edhe Albin Kurti së bashku me Glaukj Konjufcën, kur Hashim Thaçi duke shfrytëzuar aparatin shtetëror ndërtoi aktakuzë të rrejshme, se këta qëndronin prapa një përpjekje për vrasjen e tij dhe të shumë të tjerëve, për të cilën gjë pas publikimit të skandalit, është arrestuar së paku një agjent i AKI-së, për deklarime të rrejshme në gjykatë. Gjë të cilën, deklarimin e rrejshëm nën betim, e pat bërë edhe Hashim Thaçi.

Dëshmitarë kundër Hashimit edhe shokët e tij

Po ashtu edhe të shumë nga ata, që kanë mbledhë prova, madje edhe gazetarë ka në media që sot mbajnë hapur anën kinse të Thaçit, dhe që kanë dhënë dëshmi nëpër institucione të ndryshme për inkriminim të Thaçit apo edhe të tjerëve, madje shumë prej tyre edhe kanë dhënë fakte publike.

Pra, vetëm këto pak raste të përmendura mund ta çojnë numrin që qindra dëshmitarë, që të gjithë shqiptarë.

Edhe ti vet z.Baze ke thënë se Azem Syla, ka dashur vrasjen tënde në Rambuje. Azem Syla është daja i Hashim Thaçit, dhe përveç kësaj, ata ishin në krye të grupimit që akuzohet për vendimmarrje për likuidime.

Pra, ju që dikur keni bërë shkrime me fakte kundër, sot po përpiqeni ta mbroni Thaçin, por cila është fytyra juaj e vërtetë, tash që po e bëni këtë me shumë vonesë, madje pa treguar pendesë publike.

Nëse analizohet si tekst, dhe si informacion, kjo që shkruan Mero Baze, në pamfletin e tij, sigurisht të paguar tepër mirë, zbulohet kontradikta, madje ai ia ndërton një akuzë të re Hashim Thaçit.

“Si një Gjykatë e krijuar për të balancuar ndëshkimet e Gjykatës Ndërkombëtare të Hagës ndaj ish- zyrtarëve Jugosllavë për krime lufte, Gjykata Speciale e Kosovës e krijuar nga vetë Hashim Thaçi, duket se nxitoi të hante kokën e themeluesit të saj”, shkruan Mero Baze.

Nuk mund të jetë një rrëshqitje gjuhësore, përkundrazi është një tekst argumentues i mbështetur në informacion. Derisa e komenton, përkatësisht vlerëson se gjykata speciale u krijua për të balancuar ndëshkimet që pat bërë Tribunali Ndërkombëtar i Hagës për Ish-Jugosllavi, duke ndëshkuar tash drejtues të luftës apo udhëheqës të shtetit të Kosovës, ai më tej informon se po kjo gjykatë u krijua nga Hashim Thaçi: “Gjykata Speciale e Kosovës e krijuar nga vetë Hashim Thaçi”.

Pra, e para në këtë mesele dhe ankesë të Bazes dhe të tjerëve, askush tjetër nuk del fajtorë më shumë se sa vetë Thaçi, derisa ia njeh atij meritën absolute të krijimit të saj.

E dyta, meqë kjo gjykatë qenka në esencë antishqiptare, pse e krijoi Hashim Thaçi, edhe një instrument antishqiptarë!?

Pra, ju z.Baze po e njollosni Thaçin, edhe me një vepër antishqiptare!

Gjykata speciale është një shans për drejtësi për mijëra viktima qe 23 vjet të vrasjeve politike dhe të tjera. Është një shans për ta zbardhur fytyrën e tij, nëse e ka pas të tillë, edhe Hashim Thaçi me të tjerë!

________________

• Dy-tre fjalë të portalit Drini. Mero (Baze), a mos të ka pas rrahur Milaim Zeka në Rambuje, që në atë kohë ishte i afërt me Hashim Thaçin dhe Azem Sylën? A e ke dëgjuar a jo atë duke treguar se të ka rrahur… E ka thënë publikisht, i ftuar në studio! Ne nuk kemi se si ta dijmë me siguri ndodhinë, por ai e ka thënë publikisht dhe e ka pranuar se të ka rrahur në Rambuje. Secilit gazetar duhet ti vije keq nëse të ka rrahur, megjithëse ti nuk je e as që ke qenë ndonjë herë gazetar i vërtetë, pasi shpesh i ke dalur dhe i del përkrah krimit dhe atyre që mund të kenë bërë krime.