Lis Bukuroca, Gjermani
(Naser Aliu)
Mos qani nëna
ju merreni me vete vetëm krenarinë
unë krejt dhembjen
Mos qani nëna
ju vetëm m’i fshini lotët mua
djemtë tuaj u flijuan për drejtësi
Mos vështroni ashtu të pikëlluara nëna
unë jam ai që rënkon këtu
ju festoni
po mënjanojmë edhe fëmijët fashistë
për të mirën e popullit vëlla
Ju keni fat gra
fat se u bëtë nëna heronjsh
ato tjerat atje po qajnë nga turpi
ja pse lotët tuaj janë lot gëzimi
e lotët e nënave ukrainase
janë lot pendimi:
lot të kurvave
Mos dënesni nëna
mijëra veta vdesin në vit në komunikacion
dhe vdesin kot
thjeshtë në rrugë
ashtu kot
si rrugaçë
pa e denazifikuar vëllanë
si djemtë tuaj nëna
E shihni
është më mirë të vdiset për mëmëdhe
sesa në një fatkeqësie rruge
Nëna shumë të dashura,
s’lejohet përjetimi i dhembjes
sepse djemtë tuaj kaluan në jetën tjetër
ata nuk vdiqën
ata pas varrimit u rilindën si duhej
Këtë e dëshmon Kirili i Rusisë
si dje Kirili i Aleksandrisë
që copa-copa
të masakruar
hodhi në rrugë Hipatinë
filozofen e fundit të lashtësisë
Nëna
mos filozofoni
mos vini gjë në dyshim
është rrezik
mos i besoni dikujt tjetër
kujtoni Hipatinë
dhe
mijëra veta vdesin në vit nga „Vodka“ nëna
plot jargë e turp
duke u kalamendur rrugicave ruse
flokët shtëllunga
të ndyrë e erërëndë
jo si djemtë tuaj;
ata u vranë
duke kënduar për „Matushka Rasija“**
këtë fat nuk e ka çdo grua
atë fat të madh e kanë vetëm matushkat e zgjedhura nga zoti
E shihni
është më mirë të vdiset për mëmëdhe
sesa me vodkë në dorë nëna
E pastaj, nëna,
ju heroina ruse
*„e rëndësishme është se ne të gjithë jemi të vdekshëm,
se jemi në duar të perëndisë
dhe një ditë do të largohemi nga kjo botë.
Pyetja është si kemi jetuar!
Djemtë tuaj ia arritën qëllimit!
Ata jetuan.“
dhe u larguan
dhe u varrosën
të buzëqeshur e krenarë
“Unë dua që ju ta dini
se ne ndajmë këtë dhimbje me ju!”
Nëse dëshironi lekë nëna
na thoni
nëse dëshironi përqafime
kërkojini
nëse dëshiron burra për t’i zëvendësuar ata djem heroikë
mos na kurseni nëna
Gjenerali do të kujdeset personalisht
dhe
do të shtatznanojë
çdo nënë që e dëshiron
një djalë të ri
me plot mëmëdhedashuri
me plot patriotizëm
për „Matushka Rasija“
Merreni nga një gotë vodka nëna të heronjëve
pijeni me një gllënjkë
ju meritoni një fotografi me mua
të buzëqeshura
Mund edhe të më imagjinoni mbi ju
ose
më ëndërroni secila në mënyrë të vet
si operacion special
më ndieni si burrë mbi ju
apo si dashnor
si në ato çaste ku i krijuat ata djem
apo
përdormëni në fantazitë tuaj si ju pëlqen juve gra
dhe unë këtë ua lejoj vetëm heroinave
si ju
sepse kjo është kontratë speciale
që nënat e Rusisë e kanë me mua
Tani po fotografohemi nëna
mos harroni buzëqeshjen
…
25.11.2022 në fotografi diktatori rus me nënat e ushtarëve të rënë në Ukrainë dhe pasojat e “denazifikimit” me metoda fashiste…
* Nën thonjëza me shkronja të pjerrëta janë fjalët e Putinit të marra nga revista gjermane „Spiegel“
** Nëna Rusi „Matushka Rasija“
