Florim Zeqa
Rezultati i dobët i LVV-së në zgjedhjet komunale, përveq rënjes enorme në vota i ka ulur prestigjin dhe lëkundur imazhin e Albin Kurtit në qeverisjen qendrore, për arsye se pushteti lokal paraqet bazamentin dhe stabilitetin e pushtetit qendor.
Prishtina “nyja gordiane” e fatit të LVV-së
Fitorja eventuale e balotazhit në Prishtinë dhe në ndonjërën nga komunat e mëdha do ta mbante në këmbë dhe të fuqishme në pushtetin qendror LVV-në. Në të kundërtën do të ketë probleme të theksuara me qeverisjen e vendin pa mbështetjen dhe bashkëpunimin me pushtetin lokal.
Përmbysje të rezultateve mund të ndodhin në shumicën e komunave dhe për gjitha partitë që kanë dal të parat në raundin e parë. Prandaj, marrëveshjet mes partive politike janë të pashmangshme, në këtë rast edhe për LVV-në, e cila nuk mund të vazhdoj tutje e vetme me slloganin “drejt dhe krejt” apo krejt ose asgjë!
Përveq rezultatit të dobët zgjedhor të LVV-së, zgjedhjet lokale të 17 tetorit e nxoren në pah edhe fuqinë e vogël dhe të papërfillshme të listës inekzistente “Guxo”, e cila nuk e la asnjë gjurmë pozitive me paraqitjen e saj përmes iniciativave qytetare!
Zgjedhjet lokale rehabilituan partitë opozitare
Në anën tjetër, për partitë opozitare (LDK, PDK, LVV e NISMA), këto zgjedhje ishin një rast i mirë për të dëshmuar forcën elektorale, e cila dallon shumë nga zgjedhjet e paraprake parlamentare. Në këto zgjedhje ndodhi ngritja dhe rikthimi i partive opozitare, në disa raste edhe përtej parashikimeve dhe pritjeve të tyre!
Kur jemi në këtë segment, deklarata e nënkryetarit të LDK-së dhe kandidatit për kryetar të Gjilanit, Lutfi Haziri, se nuk do të ketë marrëveshje politike në bllok me askënd, më shumë e dëmton sesa e ndihmon LDK-në dhe Gjilanin në veçanti!
Anulimi i zgjedhjeve nga PZAP-ja në Han të Elezit pas ankesave të kandidatit të pavarur Refki Suma, nën dyshimin për shit-blerje të votave, e vë në sprovë të re PDK-në këtë komunë dhe jo vetëm!
AAK-ja e vogël nga zgjedhjet parlamentare na doli të jetë më e madhe me fitore në zgjedhjet lokale, kurse NISMA duhet medeomos ta fitojë Malishevën për ruajtur imazhin e ngritjes reale!
Me garimin e kandidatëve anonim, pa përvojë politike dhe pa kredibilitet qytetarë, LVV-së i kushtojë rëndë me mosfitore në asnjë komunë të vetme në raundin e parë, anipse është në balotazh në 12 komuna!
Për shkak se, në shumicën e komunave në balotazh pritet ta fitojnë partitë opozitare. Pa dyshim, rezultati final i zgjedhjeve komunale do të ndikojë në situatën e përgjithshme politike dhe nuk do të mbetet pa ndikim edhe në qeverisjen qendrore.
Heqja e “vijave të kuqe”, shpëton LVV-në
Kjo situatë, pashmangshëm do t’ia imponon LVV-së heqjen e “vijave të kuqe” për lidhjen e koalicioneve në nivel lokal me partitë opozitare, të cilat do të prodhonin një situatë krejtë tjetër sa i përket qeverisjes qendrore.
Ngase shtrirja e pushtetit lokal është determinuese për mbarëvajtjen e pushtetit qendror dhe jo vetëm. Nga bashkëqeverisja në nivelet komunale do të varen sukseset dhe jetëgjatësia e Qeverisë Kurti 2.
Anashkalimi i bashkëpunimit me partitë opozitare në nivelin lokal dhe mbështetja vetëm tek “Motorët e Diasporës” apo vota e mërgatës sonë, mund t’i kthehet bumerang Albin Kurtit, për shkak se, jo e gjithë mërgata janë me LVV-në!
Arsye se tjetër e gabimit potencial të LVV-së është fakti se, edhe po t’ju sigurohen gratis biletat e udhëtimit dhe akomodimi në hotele, jo çdo herë mërgimtarët e kanë mundësinë e ardhjes për votime në Kosovë!
Ndryshe nga zgjedhjet parlamentare, vota e Diasporës nuk do të jetë unike për një listë zgjedhore, por e fragmentuar në 22 komuna dhe e ndarë në disa lista zgjedhore.
Mbështetja e LVV-së tek “Motorët e Diasporës”, do të motivon fuqishëm lidhjen e koalicioneve dhe bashkimin e të gjitha partive opozitare në Prishtinë, Prizrenë, Podujevë, Gjilan e gjetiu, për çka mund ta lënë Albin Kurtin duarthatë edhe në raundin e dytë të zgjedhjeve lokale.
