Nga: Gëzim Muçolli
Me rastin e përvjetorit të pestë të shenjtërimit të Nënës së madhe të njerëzimit, nobelistes shqiptare Shën Nënë Terezës, komuniteti shqiptar i Trevizos organizon për herë të tretë Ditën e Shenjtores shqiptare.
Të shtunën me 18 shtator 2021 në qytetin e bukur Quinto di Treviso do të organizohet një manifestim i rëndësishëm kulturor dhe shpirtëror i cili tubon qytetarët italianë dhe mërgimtarët shqiptarë të cilët janë dëshmuar me punën dhe sukseset e tyre dhe të fëmijëve të tyre si një nga shembujt më të mirë të integrimit interkulturor në tërë Italinë.
Siç njohton veprimtari i dalluar, z. Bajram Desku kryetar i Shoqatës Kulturore-Humanitare “Shën Nëna Terezë”, në këtë ditë të shënuar autoritetet e komunës së Quintos në mëngjes do të organizojnë një takim me udhëheqësit e komunitetit shqiptar me ç’rast nga kryetarja e komunës zonja Stefania Sartori do të pritet me nderime të larta edhe ambasadorja e Republikës së Kosovës në Itali, znj. Lendita Haxhitasim.
Pas takimit protokollar në komunë, ambasadorja kosovare pritet të vizitojë edhe disa biznese të suksesshme të afaristëve shqiptarë si dhe do takohet me drejtues të tyre kryesisht mërgimtarë me prejardhje nga Kosova me ç’rast do të njihet me histori të suksesit dhe dëshirën e përhershme për të investuar në vendlindje.
Në orën 15 në vendndodhjen e shtatores së bronxtë të Shën Nënë Terezës e cila është dhuratë nga komuniteti shqiptar e inauguruar para tri vitesh, në sheshin pranë rrugës Guglielmo Marconi nr. 27,në udhëkryqin me rrugën San Pio X do të mbahet ceremonia solemne kushtuar jetës dhe veprimtarisë së saj e cila nderoi gjithë kombin me shembullin e saj frymëzues nëpërmasa planetare. Aty do të flasin disa nga autoritetet italiane nga komuna e Quintos, Provinca e Trevizos dhe Regjioni Veneto, udhëheqësi i Parrokias së Quintos, ambasadorja Haxhitasim, si dhe përfaqësues shqiptarë të Shoqatës së Quintos.
Pas mbylljes së pjesës ceremoniale sipas programit këshillit organizativ i festës ka organizuar në lokalet e Qendrës parrokiale të Quinto di Treviso në Via Graziati nr 2 një takim pune me kryetarët e shoqatave shqiptare si dhe drejtuesit e shkollave shqipe të Regjionit Veneto ku ambasadorja Lendita Haxhitasim do të bashkëbisedojë me ta lidhur me temat që i preokupojnë dhe motivojnë.
Gjithë veprimtaritë brenda manifestimit kulturor Dita e Shën Nënë Terezës dhe programi i vizitës së ambasadores së Republikës së Kosovës është përgatitur dhe do të mbahet me respektimin maksimal të masave mbrojtëse Anti-Covid 19 sipas rekomandimit të autoriteteve shëndetësore të Italisë.
