Nga: Basri Beka
___
Deklarata e Kryemyftiut të Turqisë, Ali Erbash, gjatë inaugurimit të xhamisë së Namazgjasë në Tiranë, ku ai lartësoi ushtarët osmanë që “dhanë jetën për të sjellë Islamin” në Shqipëri, është një fyerje e rëndë dhe e papranueshme për popullin shqiptar dhe historinë tonë. Përshkrimi i ushtarëve pushtues si “dëshmorë” që imponuan me dhunë fenë islame në trojet shqiptare është një përpjekje e rrezikshme për të rishkruar historinë dhe për të legjitimuar terrorin e Perandorisë Osmane që për shekuj me radhë shtypi dhe asimiloi shqiptarët.
Nuk mund të mohohet kurrë kryeheroi i kombit Gjergj Kastrioti, nga qarqet tukomëdha islamiste
***
Të quash dëshmorë ata që derdhën gjak për të pushtuar dhe asimiluar një popull, duke i detyruar shqiptarët të pranojnë një fe që nuk ishte pjesë e traditës së tyre, është një tentativë e qartë për të glorifikuar terrorin dhe shtypjen e vazhdueshme që perandoria osmane ushtroi mbi popullin tonë. Kjo është një fyerje ndaj të gjithë atyre që luftuan për lirinë e këtyre tokave dhe ndaj vetë popullit shqiptar, i cili, përmes sakrificave të panumërta, ruajti identitetin dhe dinjitetin e tij kombëtar përballë një sundimi shekullor.
Deklarata të tilla tregojnë qartë se investimet e Turqisë në Shqipëri dhe Kosovë nuk janë thjesht ekonomike apo kulturore, por mbartin një agjendë të qartë politike dhe fetare. Ndërtimi i xhamive me financime nga shteti turk nuk përfaqëson një gjest dashamirësie, por një përpjekje për të rikthyer ndikimin osman në territoret shqiptare, duke forcuar islamin politik dhe kontrollin fetar mbi shoqëritë tona.
Në këtë kontekst, është e papranueshme që xhamia e Namazgjasë të mbetet nën administrimin e një autoriteti të jashtëm. Kjo xhami duhet të merret nën administrim nga autoritetet shqiptare dhe besimtarët vendas, për të siguruar që ajo të shërbejë interesave të popullit shqiptar dhe jo axhendave politike të një shteti tjetër.
Ne kërkojmë me forcë që qeveria e Shqipërisë, si dhe Bashkësitë Fetare Islame të Shqipërisë dhe Kosovës, ta shpallin non grata Kryemyftiun turk, Ali Erbash, për deklaratat e tij fyese dhe përpjekjet për të glorifikuar pushtuesit osmanë. Shqipëria ka një histori të gjatë të luftës për liri nga sundimi osman, dhe nuk do të lejojmë që kjo histori të deformohet apo të keqpërdoret për qëllime politike nga jashtë.
Rikthimi i Gjergj Kastriotit në Prishtinë, menjëherë pas luftës së vitit 1999.
___
Ky është një moment kritik për të mbrojtur identitetin tonë kombëtar dhe për të siguruar që historia jonë të nderohet dhe të mos keqpërdoret nga ata që shtiren si miq.
Kësaj i thonë ndërhyrje në punët e mbrendshme të Shqipërisë.