Gani I. Mehmeti
- NUK KA SHQIPTAR QË DO BËHEJ MILLOSHEVIQ!
“Është e çuditshme të shohësh Kurtin duke ndjekur gjurmët e Sllobodan Millosheviqit. Ne kemi nevojë për një mentalitet krejtësisht të ndryshëm nëse presim që rezultatet të jenë ndryshe”, shkroi Gjuriq në Twitter.
A thua, di Gjuriqi se çka është fyerja?
Sikur të dinte Gjuriqi se çka është fyerja, ai vetë do të ishte më i dinjitetshëm, do të ishte i drejtë e i arsyeshëm në sjelljet e tij arrogante në shumë biseda, qëndrime e intervista të tij. Apo, mos është më shumë fyerje mosdalja në zgjegdhje e serbëve të ndikuar nga Vuçiqi, që lirisht mund të merret si ndërhyrje e një shteti në punët e brendshme të shtetit tjetër.
Çka kupton ai me kthim prapa?
Me kthim prapa, me gjasë kupton kohën e Millosheviqit, por ne nuk kemi bërë krime, përndjekje e as masakra në serbë, siç bënë ata në kohën e Millosheviqit e edhe më pas, me rastin e përndjekjes së shqiptarëve nga Mitrovica Veriore, në vitin 2000 edhe nën komandën e KFOR-it.
Çfarë marrëveshjesh të njëanshme ka anuluar Kurti, sipas Gjuriqit?
Kurti nuk ka anuluar asnjë marrëveshje. Ai, madje nuk ka paraqitur asnjë kusht për të vazhduar bisedimet mes Kosovës dhe Serbisë. Ndërsa, Vuçiqi ka kërkuar sa e sa herë kushte për çështje të ndryshme për vazhdimin e bisedimeve mes dy shteteve. Ai, madje bën ekzibicione të llojlljoshme për t’u bishtnuar bisedimeve, sa edhe nuk nënshkruan marrëveshjet, ani pse i pranon, për një lloj “arsyetimi” se nuk ka nënshkruar, duke mos e marrë seriozisht asnjërën nga marrëveshjet, përveç formimin e Asociacionit të komunave me shumicë serbe, madje duke kërkuar atë edhe me kompetenca ekzekutive!
E, si mund të formohet një Asociacion i një pakice prej 3 – 5 %, deri sa Asociacioni i të gjitha komunave nuk është me të drejta të kompetencave ekzekutive! Kjo është tejet absurde. Asociacioni i komunave me shumicë serbe, meqë është një asociacion politik, mund të formohet por pa kompetenca ekzekutive. Ai asociacion do t’u japë të drejtë në bashkëpunim mes veti komunave me shumicë serbe, dhe ai gjithsesi të jetë e të mbetet në rendin, ligjin dhe Kushtetutën e Kosovës.
Ku është ushtrimi i brutalitetit ndaj serbëve nga Kurti dhe në çfarë rastesh?
Vallë, a e di Gjuriq se kush ka ushtruar brutalitet dhe ndaj cilit popull? Këtë brutalitet e ka zhvilluar vetë Millosheviqi me Vuçiqin dhe bashkëpunëtorët e tjerë kundër shqiptarëve gjatë gjithë viteve të 90-ta. E, nëse paska ndonjë rast brutaliteti, përveç pse Kurti është për sovranitetin e Kosovës në të gjithë vendin e tij, le të tregojë. Gjuriq duhet të pajtohet se Kosova është shtet, ore. Duhet t’i lë shakatë.
Ku janë ato gjurmë të Kurtit që po e ndjek Milloshevioqin?
Sa serbë u vranë, u plagosën, u rrahën, u maltretuan, u larguan prej pune, u ndoqën nga Kosova brenda këtyre dy viteve, sa Kurti është në pushtet, ashtu si kishte vepruar Millosheviqi ndaj shqiptarëve? Sikur të shkonte Kurti gjurmëve të Millosheviqit, do duhej përndjekur serbët nga Kosova dhe do të zbrazej Kosova prej tyre.
Së fundmi, le ta japë një shembull! Por, ajo çka është qenësore sipas Gjuriqit, më mjafton se e paska kuptuar gjenocidin e Millosheviqit ndaj shqiptarëve, për çka e fajëson atë, për çka do duhej të distancohej prej Millosheviqit, jo të bëhet vetë Millosheviq në raport me shqiptarët dhe Kosovën.
Për çfarë mentaliteti të ndryshëm e ka fjalën Gjuriq, për të qenë rezultatet ndryshe?
Mentalitetin do duhej ta ndryshonte Gjuriq, i cili ka edhe sot mentalitetin e Millosheviqit ndaj shqiptarëve. Ai me mentalitetin e rtij, do duhej të pranonte Pavarësinë e Kosovës. Ky do të ishte ndryshimi i mnentalitetit, e assesi të bie sërish nën okupimin e Serbisë, siç e kërkon Vuçiqi, Gjuriqi e tjerët në Beograd.
