Presidentja Osmani merr urim për ditën e pavarësisë nga Kryetari i Presidencës së Bosnjës dhe Hercegovinës, Željko Komšić:
Bosnja dhe Hercegovina dhe Republika e Kosovës me prioritetet të përbashkëta strategjike të politikës së jashtme
Presidentja e Republikës së Kosovës, Vjosa Osmani, me rastin e 17 Shkurtit, ditës së pavarësisë së shtetit, ka pranuar telegram urimi nga Kryetari i Presidencës së Bosnjës dhe Hercegovinës, Željko Komšić.
“Të inkurajuar dhe të gëzuar me avancimin e marrëdhënieve mes dy shteteve mike, jemi të bindur që rruga e bashkëpunimit ekonomik, politik dhe çdo lloj tjetër bashkëpunimi, sikur dhe e marrëdhënieve miqësore mes Bosnjës dhe Hercegovinës dhe Republikës së Kosovës, në të ardhmen e afërt, do të ketë rëndësi të posaçme për qytetarët e shteteve tona”, thuhet në telegramin e kryetarit Komšić.
Më tej, në telegram, Komšić thekson se Bosnja dhe Hercegovina dhe Republika e Kosovës i ndajnë prioritetet e tyre të përbashkëta strategjike të politikës së jashtme, siç janë anëtarësimi në NATO dhe Bashkim Evropian. “Vetëm së bashku dhe në bashkëpunim me partnerët që i ndajnë vlerat e njëjta mund ta arrijmë qëllimin tonë”, thuhet në fund të telegramit të kryetarit Komšić.
Bashkëngjitur gjeni telegramin e urimit.
Kryeministri Kurti: Urime të gjithë qytetarëve të Republikës Dita e Pavarësisë
Në 14- vjetorin e Pavarësisë së Republikës së Kosovës, sot, Kryeministri i Republikës së Kosovës, Albin Kurti bashkë me Presidenten e vendit, Vjosa Osmani dhe Kryetarin e Kuvendit të Republikës, Glauk Konjufca, morën pjesë në ngritjen solemne të flamurit të Republikës së Kosovë nën intonimin e himnit shtetëror.
Pasi nderuan flamurin e Republikës së Kosovës, kryeministri i Kosovës, uroi të gjithë qytetarët e vendit për Ditën e Pavarësisë.
Në fjalën e tij para mediave, kryeministri Kurti tha se teksa kremtojmë e festojmë, gëzohemi dhe e urojmë njëri-tjetrin, nuk kemi se si të mos kujtojmë e përkujtojmë ata të cilët punuan dhe luftuan për lirinë e popullit dhe për pavarësinë e vendit.
“Andaj, nga kryeqyteti i Republikës këtu në oborrin e përbashkët të Presidencës, Kuvendit dhe të Qeverisë, ku bëmë nderime dhe ngritëm flamurin shtetëror do të vazhdojmë për kryeqendrën e kryengritjes të popullit tonë në Prekaz, pra tek Kompleksi Adem Jashari dhe më pastaj te varri i presidentit Ibrahim Rugova dhe i veprimtarit Adem Demaçi”, tha kryeministri Kurti.
Teksa kujtoi të gjithë ata të cilët punuan dhe luftuan e që kanë lënë gjurmë të pashlyeshme për të sotmen dhe të ardhmen tonë, kryeministri Kurti u shpreh falënderues ndaj të gjithëve dhe mirënjohës përjetë.
Kryeministri Kurti gjatë ditës do të merr pjesë edhe në vendosjen e kurorave në Kompleksin Memorial “Adem Jashari” në Prekaz, te varri i ish Presidentit, Dr. Ibrahim Rugova, varri i veprimtarit Adem Demaçi dhe në aktivitete të tjera në shënim të kësaj dite.
Deklarimi për medie i kryeministrit Kurti:
Urime të gjithë qytetarëve të Republikës Dita e Pavarësisë. Teksa kremtojmë e festojmë, gëzohemi dhe e urojmë njëri-tjetrin, nuk kemi se si të mos kujtojmë e përkujtojmë ata të cilët punuan dhe luftuan për lirinë e popullit dhe për pavarësinë e vendit. Andaj, nga kryeqyteti i Republikës këtu në oborrin e përbashkët të Presidencës, Kuvendit dhe të Qeverisë, ku bëmë nderime dhe ngritëm flamurin shtetëror do të vazhdojmë për kryeqendrën e kryengritjes së popullit tonë në Prekaz, pra tek Kompleksi “Adem Jashari” dhe më pastaj te varri i presidentit Ibrahim Rugova dhe i veprimtarit Adem Demaçi.
Të gjithë ata të cilët punuan dhe luftuan kanë lënë gjurmë të pashlyeshme për të sotmen dhe të ardhmen tonë, andaj ne u jemi falënderues të gjithëve dhe mirënjohës përjetë.
Kryetari Glauk Konjufca: Shteti ynë do të qëndrojë lart dhe i paepur përgjithmonëMe pjesëmarrjen e Presidentes së Republikës së Kosovës, Vjosa Osmani, kryetarit të Kuvendit, Glauk Konj’ufca dhe kryeministrit Albin Kurti, kanë filluar aktivitetet për shënimin e 14-vjetorit të pavarësisë së Kosovës, me ngritjen solemne të flamurit të Republikës së Kosovës.
Pas ceremonisë së ngritjes së flamurit, kryetari i Kuvendit, Glauk Konjufca, tha se sot është dita më e rëndësishme e Republikës sonë, Dita e Pavarësisë, e cila mishëron dhe sublimon përpjekjet dhe sakrificën e të gjitha gjeneratave, për lirinë tonë politike.
Kreu i Kuvendit tha se vet fakti që kjo ditë po fillon me ngritjen e flamurit të shtetit tonë, është një simbolikë që tregon se shteti ynë do të qëndrojë lart dhe i paepur përgjithmonë.
“Sot këtë ditë të rëndësishme të shtetit tonë do të shënojmë me aktivitete të shumta, ashtu siç e meriton ajo, prandaj shfrytëzoj rastin që të gjithë qytetarëve të Kosovës t’ua uroj Ditën e Pavarësisë”, theksoi kryetari Glauk Konjufca.
Mediave iu adresuan edhe presidentja Osmani dhe kryeministri Kurti.
