Shkruan: Adem Lushaj, autor i librit
Libri im, “Krimet Serbe në Kosovë – Rasti i Deçanit”, ka filluar të depërtojë në qarqet intelektuale, akademike dhe politike në qytetin e Urfës, Turqi, falë përkushtimit dhe angazhimit të botuesit Ramiz Tafilaj. Ky libër, i cili dokumenton mizoritë serbe ndaj popullatës shqiptare, po zgjon interes të madh, veçanërisht te personalitete me ndikim në politikë, biznes dhe akademi.
Në kuadër të këtij promovimi, libri është dorëzuar tek:
- Vedat Doğar, drejtor i Shërbimeve të Përgjithshme dhe Gastronomisë në Rajonin e Urfës, me rrënjë shqiptare dhe një figurë e njohur në qytet si pronar i disa farmacive dhe prodhues i ilaçeve shëndetësore.
- Mahmut Keskinbıçak, zëvendëskryetar i Asamblesë së qytetit të Urfës, ekspert në fushën e agronomisë, i cili ka vizituar shpesh Deçanin dhe e njeh mirë historinë e tij.
- Ismail Yeşildağ, drejtor i Drejtorisë së Arsimit për Rajonin e Mesopotamis me qendër në Urfa.
- Abdülselam Ilhan dhe Fevzettin Yıldız, drejtues të Shkollës së Mesme Artistike dhe të Talenteve Vizuale “Kazancı Bedih Güzel Sanatlar Lisesi”.
Një promovim me ndikim në qarqet politike dhe intelektuale
Në një ngjarje të organizuar në Urfa, ku morën pjesë personalitete të rëndësishme politike dhe akademike, disa kopje të librit iu dhuruan:
- Abdülselam Yıldız, kryetar i partisë më të madhe në Rajonin e Urfës, “Yeni Refah Partisi”, si dhe kryetarëve të degëve të kësaj partie.
- Ali Aşan, drejtues i EDDO MUZIK, institucioni më i njohur muzikor në rajon, me ndikim në komunitetin bektashi.
Ky promovim nxiti diskutime të gjera mbi krimet serbe të kryera në Kosovë dhe rëndësinë e dokumentimit të tyre. Pjesëmarrësit shprehën dëshirën që unë si autor i librit të vizitoj Urfën për të ndarë nga afër përvojën dhe njohuritë e mia mbi këtë temë.
Urfë – një urë lidhëse për përhapjen e historisë së Kosovës
Sanliurfa (Urfë) është një qytet historik në juglindje të Turqisë, i njohur për trashëgiminë e tij kulturore dhe fetare. I quajtur shpesh “Qyteti i Profetëve”, besohet se është vendlindja e Profetit Ibrahim. Me lidhjet e saj të forta me Ballkanin dhe komunitetin shqiptar, Urfa përbën një terren të rëndësishëm për ndërgjegjësimin ndërkombëtar mbi krimet e kryera në Kosovë.
Përhapja e këtij libri në qarqet më të larta të Urfës është një hap i rëndësishëm në ndërkombëtarizimin e së vërtetës historike dhe në diplomacinë kulturore të Kosovës. Falënderoj Ramiz Tafilajn për përkushtimin e tij në shpërndarjen e këtij libri dhe për ndihmën në sjelljen e kësaj teme në vëmendjen e opinionit turk.
