Lirim Gashi, shkrimtar nga Prishtina
A keni menduar ndonjëherë pse politikanët tanë në pushtet e masakruan në dy dekadat e fundit vullnetin e qytetarëve të tyre, për ta formësuar në mënyrë aktive politikën lokale dhe shtetërore, apo më saktë pse e masakruan thelbin e demokracisë ?
Lind pyetja ; cili është thelbi i demokracisë?
Thelbi i demokracisë është përfshirja dhe pjesëmarrja aktive e sa më shumë qytetarëve në formësimin e politikave lokale dhe shtetërore në përputhje të plotë me interesat e tyre, gjë që rezulton me rotacion të shpeshtë demokratik dhe paqësor të pushtetit.
Dmth që rezulton me një dërgim demokratik dhe paqësor të pushtetarëve në opozitë dhe opozitës në pushtet, edhe kur qeveria është më e mirë se opozita dhe anasjelltas.
Pse pushteti duhet të dërgohet rregullisht në opozitë, e madje edhe atëherë kur e bën mirë punën e tij ?
Për të parandaluar që politikanët në pushtet të krijojnë ndjenjën se ata janë përfaqësues të përhershëm të Zotit në pushtet dhe jo përfaqësues të përkohshëm të qytetarëve në pushtet.
Sepse nëse fillojnë të besojnë se në pushtet janë si përfaqësues të përhershëm të Zotit, atëherë ata i konsiderojnë qytetarët dhe pronën e tyre si pronë të tyre private.
Ku funksionon më së miri demokracia e vërtetë plebishitare, apo më mirë të them demokracia e drejtpërdrejtë?
Natyrisht në Zvicër ku populli pyetet për çdo vendim të rëndësishëm të qeverisë, në plebishitet e shumta që i nënshtrohen parimeve dhe rregullave të vërteta demokratike .
Ku funksionon më së keqi demokracia plebishitare?
Natyrisht në Gjermani, ku populli abuzoi keq me të drejtën e tij për të formësuar në mënyrë aktive politikën lokale dhe shtetërore, duke ia besuar votën e tij Adolf Hitlerit, njeriut më gjenocidal në historinë e njerëzimit.
Si arritën gjermanët të krijonin megjithatë një demokraci indirekte?
1 Nëpërmjet ndalimit të plebishitit të popullit per kontestimin e vlerave të vërtetuara njerëzore, kombëtare, universale dhe demokratike, pra nëpërmjet shpalljes së këtyre vlerave si të shenjta dhe të pacenueshme nga askush.
dhe
2. Nëpërmjet forcimit të demokracisë parlamentare dhe monitorimit të gjithanshëm të kompetencave të qeverisë.
Sepse ndarja e pushtetit dhe forcimi i monitorimit të gjithanshëm të punës së tij, e bëjnë të pamundur krijimin e mbinjerëzve në politikë, të cilët mund ta vjedhin pafundësisht pronën publike dhe shtetërore, ta shkatërrojnë totalisht demokracinë, rendin dhe ligjin, si dhe të vendosin individualisht për jetët dhe vdekjet e qytetarëve.
Si arritën politikanët kosovarë të vrasin vullnetin e qytetarëve për të formësuar në mënyrë aktive politikën lokale dhe shtetërore në dy dekadat e fundit?
Fillimisht nëpërmjet garës me njëri-tjetrin në uzurpimin e meritave të luftës, që u manifestua si një propagandë tejet dashakeqe dhe primitivë mediatike.
Pse e bënë këtë?
Sepse e dinin që fituesit e kësaj gare propagandistike do ta fitojnë edhe besimin (votën) e popullit.
Mirëpo çfarë ndodhi në të vërtetë?
Humbësit e kësaj gare filluan të vrisnin kundërshtarët politikë, sepse shpresonin se duke vrarë ajkën intelektuale te partive kundërshtare do t’u jepnin atyre goditjen fundit vdekjeprurëse.
Megjithatë, partia që erdhi në pushtet pas fitores në një garë kaq primitive mediatike, nuk kishte de fakto fuqi vendimmarrëse politike për të formësuar politikën lokale dhe shtetërore, sepse Kosova nuk ishte shtet i pavarur deri në vitin 2008.
Çfarë ndodhi pas shpalljes së pavarësisë?
Dy partitë më të mëdha, Ldk dhe Pdk, erdhën në pushtet dhe abuzuan me votën, pra me besimin e popullit, në format më të pamëshirshme.
Më saktësisht, drejtuesit e këtyre dy partive shpërdoruan funksionet e tyre në politikën lokale dhe shtetërore, për të grabitur me forcë pasurinë e popullit, buxhetin e shtetit, taksat, doganat, donacionet, thesarin dhe fondet e zhvillimit.
Edhe më keq:
Ata organizuan privatizime ekstrem mafioze të pronave publike dhe aseteve shtetërore, përmes tenderëve të manipuluar, nga të cilët pasuroheshin marramendshëm ose familjet e tyre, ose bashkëpunëtorët e tyre më të ngushtë politikë.
Edhe më keq:
Me pasurimin marramendës nga plaçka shumëdimensionale, këto dy banda politike blenë dhe korruptuar mediat, shoqërinë civile dhe elitat intelektuale.
Edhe më keq :
Elitat intelektuale i kthyen në ndihmësit e tyre më besnik në shkatërrimin e arsimit, shkencës, kulturës, muzikës, artit dhe sportit.
Sepse duke nxjerrë në treg diplomat e shkollave dhe universiteteve dhe duke i kthyer këta tempujt të arsimit në tempuj të injorancës, ata vranë trurin, nderin, etikën, moralin dhe dinjitetin e qytetarëve, që më pas u shitën atyre votat për një mbushje të vetme telefoni.
Pra, një pjesë e konsiderueshme e kosovarëve e shitën veten aq lirë në tregun politik, saqë për një mbushje telefoni ua shitën votat banditëve të këtyre bandave politike.
Mirëpo, këta banditë politikë, për t’ia lehtësuar vetvetes një grabitje kaq masive të pronave të qytetarëve dhe të aseteve shtetërore, vunë në mënyrë mafioze në kthetrat e tyre prokurorinë, drejtësinë dhe Ministrinë e Brendshme, në mënyrë që asnjë krim madhor të mos zbulohet dhe asnjë kriminel apo hajdut i madh politik, ekonomik dhe financiar të mos dënohet për asnjë krim.
Çfarë bënë vendimmarrësit tanë kyç politikë në dy dekadat e fundit me politikën e jashtme?
Ata e kthyen atë në një vendpushim të këndshëm për anëtarët e familjeve të tyre dhe në një koncert për plotësimin e dëshirave muzikore të politikanëve serbë në negociatat e Brukselit.
Sepse anëtarëve të delegacionit serb në negociatat e Brukselit ata ua plotësuan pothuajse çdo dëshirë muzikore.
Prandaj u kthyen në Kosovë me marrëveshjen e nënshkruar për Asociacionin Racist të Komunave Serbe me kompetenca ekzekutive.
Dhe kjo nuk është gjë tjetër veçse një tradhti klasike, e interesave kombëtare dhe shtetërore të shqiptarëve të Kosovës.
Mirëpo, kur panë që djalli e hëngri shakanë, sepse shumica e qytetarëve e kuptuan se ishte një tradhti klasike kombëtare dhe shtetërore, ata e iniciuan dhe hodhën në tregun diplomatik ndërkombëtar, axhenden për ndarjen e Kosovës, duke lobuar me paratë e taksapaguesve në Uashington dhe Bruksel për copëtimin e shtetit të tyre.
Në mënyrë paradoksale, SHBA-të ia vunë këtyre banditëve në rrugë si një pengesë të pakapërcyeshme pikërisht Gjykaten Speciale, të cilën Serbia e krijoi për ta shpallur UÇK-në ndërkombëtarisht dhe ligjërisht si Organizatë Terroriste dhe për t’ia lëkundur themelet e shtetit tonë.
Pra pikërisht te njëjtën Gjykatë, të cilën këta banditë e votuan me duart e tyre në Kuvendin e Kosovës, duke i ngritur me krenari duart lartë, sepse Hashim Thaçi ju thoshte “kush nuk e voton e këtë Gjykatë, është armik i popullit dhe shtetit”.
Ndaj lotët e tyre të krokodilit, janë po aq të shëmtuar dhe të rremë sa karakteri i tyre.
Kur kësaj i shtojmë regjionalizimin antikombëtar dhe antishtetëror të Kosovës nga Lutifi Haziri dhe demarkacionin e padrejtë me Maqedoninë e Veriut dhe Malin e Zi, e shohim shumë më qartë dëmin gjithëpërfshirës që këta banditë politikë dhe mafioz i bënë kombit dhe shtetit të tyre.
Nga ana tjetër, një pjesë e konsiderueshme e qytetarëve të përçarë, të manipuluar, të hutuar dhe të çmendur nga propaganda keqdashëse mediatike, në vend që të protestonin, iu bashkuan Pdk-së apo LDK-së si tufë delesh, sepse nuk e kuptuan se këto dy parti mafioze u shkrinë në një bandë, pra në Prontomafian 1 dhe 2.
Ndërsa satelitët e këtyre dy bandave politike mafioze, AAK-ja e Ramushit dhe NISMA e Fatmirit, u ngjitën në peshoren e ndarjes së pushtetit, duke mbështetur rregullisht bandën që u premtoi përfitimin më të madh nga grabitja gjithëpërfshirëse.
Pjesa tjetër e qytetarëve, në vend që të protestonin spontanisht, ose i bojkotuan rregullisht zgjedhjet lokale dhe parlamentare, ose u larguan përfundimisht nga Kosova, ose prisnin që lideri i vërtetë i opozitës Albin Kurti t’i thërriste në protestë.
Prandaj nuk është çudi që Albin Kurti erdhi në pushtet me 51% të votave.
Sepse gjatë kohës sa ishte në opozitë, ai e luante herë rolin e Akademisë së Shkencave dhe të Arteve, herë rolin e Shoqërisë Civile dhe herë rolin e Tribunit të Popullit.
Me qëllim po e lë anash depërtimin e islamit politik, sepse është një temë e veçantë, që meriton analizë të fundamentuar shkencore.
____
* Autori është kryetar i Forca e Diasporës për Kosovën, FeD, me qendër në Prishtinë.
