Behlul Jashari , Prishtinë
PRISHTINË, 12 Korrik 2024/ Republika e Kosovës ka 1,586,659 banorë rezidentë, prej të cilëve 795,046 meshkuj (50.1%) dhe 791,614 femra (49.9%), sipas rezultateve paraprake të publikuara sot nga Agjencia e Statistrikave të Regjistrimit të Popullsisë, Ekonomive Familjare dhe Banesave (ReKos 2024) të zhvilluar në vitin 2024 nga 05 Prilli deri në 24 Maj. Regjistrimi i diasporës, përmes portalit eDiaspora, vazhdon deri më datën 31 Gusht 2024.
Ky është Regjistrimi i dytë i popullsisë në Kosovën e pavarur, pas të parit të zhvilluar në vitin 2011.
Shifrat e publikuara sot përfshijnë vetëm banorët vendorw, jo edhe diasporën.“Në Regjistrimin e Popullsisë janë grumbulluar të dhënat për popullsinë e zakonshme rezidente (pra, ajo që jeton në Kosovë) si dhe popullsia jorezidente (ajo që jeton jashtë Kosovës – diaspora). Këto dy te dhëna janë të ndara krejtësisht (bazat e shënimeve) dhe Agjencia e Statistrikave e Kosovës do të publikojë ndaras raportet për popullsinë rezidente dhe atë jorezidente”, thekson Agjencia.
Regjistrimi 2024 u zhvillua në të 38 komunat e Kosovës, sipas rezultateve paraprake në 9 prej tyre kishite rritje të numrit të popullsisë, e në 29 komuna kishte zvogëlim, ndërsa mosha mesatare është 34.8 vjet vjet. Ka një rritje të moshës për 4.85 vjet nga regjistrimi i vitit 2011 kur mosha mesatare ishte 29 vjet. Tani dominon mosha 20 deri 24 vjet, e në vitin 2011 dominonte grupmosha 10 deri 19 vjet.
Në ngjarjen e organizuar nga Agjencia e Statistikave të Kosovës, mori pjesë edhe Kryeministri i Republikës së Kosovës, Albin Kurti, i cili në adresimin e tij tha se realizimi i regjistrimit të popullsisë ka qenë një nga projektet më me prioritet të Qeverisë së Republikës së Kosovës gjatë këtij viti, duke marrë parasysh rëndësinë e të dhënave në kohë si dhe raundin e regjistrimeve globale (2015-2024).
Kosova-banorët nëpër komuna
“Ky regjistrim nuk është thjesht një ushtrim statistikor; është një reflektim i përkushtimit tonë për të kuptuar dhe adresuar nevojat e popullatës sonë – duke siguruar si shpërndarje të barabartë të burimeve po ashtu edhe hedhje të bazave për vendimmarrje të informuar që do të formësojë të ardhmen e Kosovës”, u shpreh ai.
Statistikat janë një e mirë publike dhe duhet përdorur për marrjen e vendimeve bazuar në dëshmi. Në demokraci, marrja e vendimeve politike duke u bazuar në dëshmi, pra statistika është shumë me rëndësi për të siguruar transparencë dhe llogaridhënie, shtoi më tej Kryeministri.
Ai falënderoi qytetarët, partnerët dhe institucionet publike në krye me Agjencinë e Statistikave të Kosovës, për punën e palodhshme dhe kontributin për realizimin e këtij projekti shumë të ndërlikuar dhe tejet të rëndësishëm për vendin.
Sipas regjistrimit të kaluar të popullsisë të pranverës 2011, në Kosovë, pa veriun, u numëran 1.739. 825 banorë rezidentë, 92.93 % shqiptarë. Pjesa tjetër e përqindjeve iu takonte komuniteteve pakicë, 1.58% boshnjakë, 1.47 % serbë, 1.08 % turqë, etj.
Por, numri i banorëve-shtetasëve të Kosovës ishte më i madh, meqë regjistrimi i popullsisë nuk kishte përfshirë një të tretën e kosovarëve që vlerësohej se jetojnë e punojnë jashtë vendit.
Përqindja e komunitetit serb do ishte më e lartë me përfshirjen e veriut në regjistrim. Në veri të Mitrovicës dhe tre komuna tjera veriore – Leposaviç, Zubin Potok e Zveçan, ku është refuzuar regjistrimi i popullsisë, sipas një shifre që e kanë përmendur atëherë autoritetet kosovare, jetonin rreth 40 mijë serbë.
Sipas statistikave kosovare, në regjistrimin e popullsisë të vitit 1981, ku u përfshinë të gjitha etnitë, Kosova kishte një popullsi prej 1.584.440 banorësh.
Kosova në verën e para më shumë se gjashtë dhjetëvjetëshave arrinte numrin prej një milion banorëve. Në 6 korrikun e vitit 1962, gazeta tradicionale kosovare Rilindja shkruante se Kosova “fitoi këto ditë banorin e njimilionit…”
Newborn-Kosovë-foto – Behlul Jashari
RILINDJA NË 1962: KOSOVA FITOI BANORIN E NJIMILIONIT
Gazeta tradicionale shqiptare në Kosovë RILINDJA e datës 6 Korrik 1962 shkruante se Kosova “fitoi këto ditë banorin e njimilionit…”
