Rileximi i librit të Jusuf Buxhovit “KTHESA HISTORIKE 1-Vitet e Gjermanisë dhe epoka e LDK-s”

____

Jam duke lexuar për herë të dytë librin e Jusuf Buxhovit “KTHESA HISTORIKE 1-Vitet e Gjermanisë dhe epoka e LDK-s”, një kronikë në të cilën autori ishte edhe aktor i ngjarjeve nga viti 1976 kur emërohet korespondent i përhershëm në Bon deri pas mbarimit e luftës në Kosovë, 2006.

Askund sikur në këtë libër nuk përshkruhen ngjarjet epokale të shembjes së komunizmit dhe lindjes së epokës së shpëtimit të Kosovës.

Desha të theksoj rolin e opinionit, mediave gjermane dhe të Qeverive gjermane në përcaktimin e saktë: të shembjes së murit të Berlinit dhe rënies së komunizmit; mbijetimit të ish RSFJ-së në kushtet e bipolaritetit midis blloqeve, mosinkuadrimit si ndërmjetësim bllokist dhe rolin e pakënaqësive të shqiptarëve në Jugosllavi në shkatërrimin e saj, nëse serbët si kundërmasë për kërkesat politike të shqiptarëve nuk e zgjedhin mirëkuptimin, por përqafojnë nacionalizmin serbomadh.

Se gjermanët dhe austriakët ishin miq të shqiptarëve përherë, në shpalljen e pavarësisë së Shqipërisë më 1912 dhe në sensibilizimin e opinionit botëror për Kosovën, kërkesat e saj, përkrahjen e lindjes së pluralizmit politik pas shkatërrimit të monizmit, këtë nuk ka shqiptarë që e vë në dyshim.

Këtë status timin në fcb.vendosa ta shkruaj dhe komentoj me miqtë e mi për një moment, i cili ndoshta asnjëherë nuk është përmendur dhe diskutuar në media, por zotëri Buxhovi si njohës i kësaj problematike, i sapo emëruar korespondent i të përditshmës kosovare “Rilindja” në Bon, kur përshkruan vizitën e Helmut Shmitit në maj 1977 në Beograd kur në takim me Titon, Presidentit jugosllav i kishte thënë se “ngritja e statusit të Kosovës në shkallën e republikës, do t’i shkonte për shtati forcimit të mëtejshëm të Federatës Jugosllave”.( fq. 55).

Pra, gjermanët zyrtarisht katër vite para ne shqiptarëve në kërkesat e pranverës ’81, paskan kërkuar Kosovën Republikë nga Kancelari i saj i atëhershëm. Kurrë nuk e kam ditur këtë!!!

Kjo kërkesë si pyetje, “pse Kosova nuk është Republikë?”, siç dokumenton Buxhovi në librin e tij, i ishte shtruar edhe Vlladimir Bakariqit, kroat, njëri ndër politikanët më me ndikim në nomenklaturën politike të RSFJ-së me rastin e promovimit të librit të Karl Gustav Shtröm, “Jugosllavia pa Titon” që doli nga shtypi në gjysmën e vitit 1979, në promovimin e të cilit kishte qenë i ftuar Bakariq dhe në pyetjen që iu shtrua:” pse Kosova nuk mund të jetë Republikë dhe kend e pengon kjo?!”, ai i lodhur nga mosha, pa një pa dy u shpreh sinqerisht:” Vërtetë nuk di pse Kosova nuk është republikë dhe kend e pengon kjo!”, duke qeshur me ironi.(fq.83).

Duke e njohur situatën në ish RSFJ për së afërmi përmes gazetarëve e diplomatëve, shtypi perëndimor, duke e ditur se si mbahej Jugosllavia me Titon si kyq i saj, disa vite para vdekjes së tij kishte filluar të shtronte pyetjen:”Çka pas Titos” dhe “Jugosllavia pa Titon”. Këtu fshihej e gjithë e vërteta që e nuhaste dhe e dinte e donte ta zbulonte perëndimi, të cilën të vërtetë, mundohej ta mbulonte propaganda titiste, në radhë të parë serbomëdhenjtë se:”Edhe pas Titos-Tito!”, për ta kamufluar qëndrimin e mezipritur për shkatërrimin e asaj krijese, me të cilën Serbia e pas Kushtetutës së vitit 1974, ku Serbia ishte ç’pushtetizuar nga Krahinat Autonome Kosova e Vojvodina, nuk mund të pajtohej dhe mezi priti “kundërrevolucionin në Kosovë”, për “Kosovën Republikë”, më 1981, për të përgjakur gjithë RSFJ-në në emër të “ligjshmërisë” që e proklamonte politika e Millosheviqit me automatik në dorë.