Lirim Gashi, Prishtinë
Nuk më befason aspoak fakti që Bashkësia Islame e Kosovës kurrë nuk proteston kur myslimanët paqësorë vriten dhe masakrohen nga talebanet ekstremistë, vahabistë dhe selefistë.
Paftytyrësia e kësaj Shoqate Mafioze s’ka kufi.
Kjo Ndërmarrje Kriminale dhe anti kombëtare shet me tonelata moral dhe kritere të dyfishta, ndërkaq xhemati (populli) shkon e i bjen në sexhde, sepse beson se Allahu banon në xhamitë e saj.
E në fakt në xhamitë e Bashkësisë Islame të Kosovës banon vetëm shejtani.
Ndërkaq Allahu i vërtetë banon vetëm në zemrat e njerëzve të mirë.
Në Kosovë korrupsionin dhe krimin e organizuan dhe menaxhuan pashtunet e Ises dhe talebanet e Hashimit, të cilët nëpër shkollat e Udbes mësuan sesi të mbahen për të fortin, prandaj u deklaruan rrejshëm si pro amerikanë.
Krejt lehtë është për ta kuptuar se kush ishin dhe janë.
Mjafton t’i zhveshim nga deklarimi i rrejshëm si “pro amerikanë”, për ta kuptuar se kush ishin dhe janë.
Sepse në momentin që ua heqim maskat pro amerikane, u dalin në shesh mendjet dhe trupat talebane.
Nëse e analizojmë pa emocione, respektivisht me mendje të hapur, mënyrën sesi e (keq) trajtuan popullin dhe shtetin e tyre, atëherë do të vijmë në përfundim se nuk dallojnë fare nga talebanët.
Sepse në njërën anë u deklaruan si pro amerikanë, e në anën tjetër biznesin, respektivisht allashvereshin më të madh të tipit “aksham pazar”, e bënin me kriminelet serbë, turq dhe arabë .
Ata në fakt tërë kohën silleshin si dyzet cubat e Ali Babes, sepse bënin zullum të papërmbajtur.
Këtë e dëshmon sidomos mënyra sesi (keq) sundonin, ngaqë ajo ishte totalisht në kundërshtim të plotë me filozofinë shtet-ndërtuese amerikane.
Sepse shkollat i shndërruan në tempuj të analfabetizmit, xhamitë në tempuj të ekstremizmit, spitalet në tempuj të vdekjes, fabrikat në shtalla të deleve, muzikën në tempull të magjupizmit, kulturën në tempull të pakulturës, shkencën në tempull të hamendësisë, edukatën në tempull të qyqarisë, papërgjegjësisë dhe improvizimit, ndërkaq popullin në nomadë të lindjes, veriut, jugut dhe perëndimit.
Në fakt shtetin e molen si barinjtë pashtun (me origjinë ilire) lopën, e madje ia shiten pjesërisht edhe mishin.
Demarkacioni me Maqedoninë e Veriut dhe Malin e Zi, është dëshmi se shtetin jo vetëm që e molen si lopën, por edhe ia shiten një pjesë të mishit të saj fqinjëve maqedonas dhe malazezë.
Të parëve për miza, ndërsa të dytëve për viza.
Vite më radhë kam shkruar se në këtë shoqëri dhe shtet është alarmante dhe e trishtueshme sasia e budallallëkut, krimit, korrupsionit, hipokrizisë, prapambeturisë, analfabetizmit, diletantizmit, amatorizmit, demagogjisë, bajraktarizmit, psikopatisë, auto-sadizmit, nepotizmit, indiferencës, makijavelizmit, narcizmit, hardallizmit, si dhe kulturës dhe edukatës orientale të tipit “aksham pazar”.
E sidomos shpesh e kam përshkruar potencialin dhe kreativiteti e lartë zvarranik, krimogjen, lakmitar, tinëzar dhe tradhtar të njerëzve që i mbajtën për njëzet vite më radhë, pozitat kyçe në hierarkinë partiake dhe shtetërore.
Në fakt tërë kohën jam përpjekur për t’ua sqaruar njerëzve të rëndomtë, se pikërisht talenti, potenciali dhe kreativiteti i tyre për mbrapsht, na ka shndërruar në armiq të vetvetes, ndërsa prej një sasie aq të lartë të armiqësisë ndaj vetvetes, nuk ka shans të na shpëtojë asnjë mik, edhe në qoftë se e ka një shkop magjik.
Fatkeqësisht shkrimet e mia mbetën të papërfillura, edhe pse dhjetëra herë u dëshmuan si profeci.
Megjithatë paralela ndërmjet Kosovës dhe Avganistanit përveç që është dashakeqe është edhe idiotike.
Sepse për fat të mirë populli ynë ka filluar të piqet dhe vetëdijesohet me një shpejtësi e cila lë vend për shpresë.
Mirëpo si duket politikanët tanë që dikur kishin lojë të lehtë me popullin e prapambetur, ende nuk e kanë kuptuar që ky i fundit në ndërkohë shumë përpara ka ecur.
Prndaj për momentin ata janë të vetmit që shumë prapa kanë ngecur.
Pse USA nuk do të veprojnë me Kosovën si me Avganistanin?
Sepse vendit ku jetojmë ne, ende i thonë Evropë, ani pse ne e trajtojmë si lopë.
