Ibrahim Kelmendi, Gjermani
Kolonelin gjirokastrit Dilaver Goxhaj, më 8 mars 1999, BKK (Bandak kriminale e komplotiste) e ka kooptuar si zv-shef i Shtabit të Përgjithshëm (SHP) të UÇK-së…
Kësaj radhe nuk u besova veshëve kur dëgjova Kolonelin Goxhaj duke e akuzuar Perëndimin për agresionin e Rusisë në Ukrainë…
KOLONELI GOXHAJ [më 02.04.2025, nga minuta 27 e intervistës]:
“Unë kam vajt [në luftë] në ditët e para të marsit [1999], para se të hynte NATOua në luftë. Në datën 23, në orën katër e gjysmë në pasdite, na bie telefoni në Shtabin e Përgjithshëm. Neve kishim telefona satelitorë. Na i kishte dhënë ushtria gjermane. Dhe telefonat satelitor neve i kishim në të gjitha brigadat, nga brigadë e lartë, në zonat operative. Të gjithë kishim telefona satelitor që flisnim pa ndërprerje dhe nuk përgjoheshim. Nuk na përgjonte dot Serbia, sepse gjithçka e kishte marrë në dorë Gjermania. Dhe kur mbaroi lufta, vajti personi jonë për ta marrë llogarinë. Ishte rreth katër milionë Marka. Vajti në ministri të mbrojtjes. Aty i thanë ik në shtab të përgjithshëm. Ata i thanë: “ik, se i kishit t’falur” (…)”
IBRAHIM KELMENDI: Më vjen keq që Dilaveri paskësh keqkuptuar informimin tim për telefona satelitorë që i kishte në përdorim UÇK-ja gjatë lufte. Ata nuk na i kishte dhënë ushtria gjermane, por i kishim kontraktuar vet nga Telecom i Gjermanisë. Më konkretisht, LPK-në, Nëndega në Gjermani, e kishim legalizuar si OJQ, me emrin Bashkësia Demokratike e Shqiptarëve në Gjermani (BDSHGJ). Në kuadër të asaj Bashkësie e kishim Fondin “vendlindja thërret”. Na ishte njohur statusi i bamirësisë (ndoshta rast i vetëm në të gjitha shtetet)…
Nga marsi 1998 kemi filluar të marrim me qira telefonat satelitor. Çmimi për minutë na kushtonte 4,5 DM (respektivisht 2,25 Euro). Kur ka shkua Koloneli Goxhaj në Kosovë, më 8 mars 1999, UÇK-ja duhet t’i ketë pas në shërbim rreth 125 telefona satelitorë të Telcom-it gjerman dhe rreth 20 telefona satelitorë të firmës gjermane CPN, meqë pronari i asaj firme na pat vizitua në Zyrë të Fondit në Bonn dhe na ofroi telefona satelitorë më 4 DM minutën.
UÇK kishte edhe pak telefona të tjerë satelitor, të cilët individët privat ua kishin dërguar të njohurve të tyre në radhë të UÇK-së. Këtë e mësuam nga NATO. Bëhej fjalë për 4 telefona satelitorë që ishin marrë me qira në USA, por që ofronin shërbim të satelitëve rus. Na u dhanë numrat e tyre me lutje që të mos përdorën ata telefona në komunikim me NATO.
Fatura mujore vetëm e telefonave të Telcom-it gjerman pat arrit deri në 500 mijë DM në muaj.
Në fund të marsit 1999, rastësisht, më shkrepi mendja: “pse nuk provoi t’ia shkarkoi ushtrisë gjermane pagesën e atyre telefonave?” Telefonova në Ministri të mbrojtjes. Luta të më lidhin me Shtabin që e kishin ngrit enkas për Kosovën. I fola: “komunikimi që po bën NATO me UÇK përmes telefonave satelitorë është në rrezik, sepse nuk kemi më kapacitet financiar për t’i paguar…” Zotëriu që ishte në telefon u mundua të më bind që kisha telefonuar në numër të gabuar. Unë e luta të konsultohet me eprorët e tij në Shtab. Ma mbylli telefonin pa ndonjë marrëveshje. Pas rreth 20 minutave më cingëroi telefoni. U informova se duhej të shkoja të restoranti përball Zyrës së Fondit (në Bonn), sepse atje do të vinin dy veta për t’më takuar. Ata më thanë: “nuk keni nevojë të paguani më telefonat satelitorë që i keni nga Telecom. Do shkoni formalisht në Telecom të ai që përkujdeset për telefonat që i keni kontraktuar. Ai do t’ju informon se më nuk do të paguan DVAD e.V. (siç e kishte akronimin zyrtar, në gjermanisht, Bashkësia jonë).” [perifrazim].
Ashtu ndodhi. Në Telecom na u tha që do na lëshojnë formalisht fatura, por nuk duhet të paguajmë. Bëmë edhe formalitetet që Telecom të mos kishte autorizim për t’i tërheq nga xhirollogaria e DVAD e.V. shumat që na shkaktoheshin nga telefonimet satelitor.
Rreth një muaji pas mbarimit të luftës Telcom kishte dërguar faturë në banesë në Këln, meqë Zyra e Fondit ishte mbyll. Kishte shifrën e borxhit të mbëtur diç mbi 1,4 milonë DM. Bashkëshortja qe shqetësuar shumë. Nuk e sqaroja dot përmes telefonit, meqë isha nën hetime nga BKA [Endti Federativ i Kriminalistikës]. Akuza e tyre: “financim i organizatës terroriste UÇK”. Kjo me qe thënë në telefon në agimin e 15 qershorit 1999, kur BKA ishte duke bërë bastisjen e banesës në Këln…
Ia pata paraqit “ministrit të financave”, Adem Grabocit, kopjen e asaj fature. Ai tashmë e kishte komplotuar Fondin “vendlindja thërret”, me urdhër “qeveritar”, duke e shpall ate “fond i qeverisë së përkohshme”. Kishte emëruar Kushtrim Hadergjonaj shef të atij fondi. Adem Graboci që zgërdhirë: “nuk ia vlen ta paguajmë atë borxh, sepse qenka shkas i mirë për t’na u hek qafe, duke të mbajt në burg gjermanët…”
Kështu ka ndodhur, Miku Dilevar Goxhaj. Mos e glorifiko angazhimin tonë, sepse nëse pitja është ngrënë, ka mbet tepsia, thoshin në anët tona. Që do të thotë, edhe për telefona satelitorë kanë mbet shënime në institucionet e Gjermanisë dhe në NATO. Ata që të dëgjuan, të kanë besuar. Pastaj do të zhgënjehen, kur do të informohen se nuk ishe i saktë. Kështu më ndodhi mua kur të besova se Shtabi i Përgjithshëm i UÇK-së ishte formuar më 11 qershor 1999, sepse Ti i kishe besuar mashtrimit të Jakup Krasniqit…
Gjatë procesit gjyqësor në Hagë, kundër Hashim Thaçit & Co, po korrigjohen shumë mashtrime që janë bërë.
Shëndet, mbarësi, respekt!
___
