Nga: Zeqir Bekolli, Elbasan
- Me një metodë operimi pacienti menjëherë lirohet për shtëpi
“Nodulet Hemorroidale” është vepra e Dr. Sci Luan Mustafa, me bashkautor Dr Mirtan Mustafen, që për nga aspekti përmbajtësor përbën një tekst profesional-shkencor, që do t’ju hyjë në punë jo vetëm mjekëve, që për specializim marrin fushën e hemoroideve, por edhe nxënësve e studentëve të mjekësisë.
Që nga parathënia, e përgjatë terë librit, shpjegohen në hollësi të gjitha aspektet e zhvillimit të hemoroideve, mënyrat e shfaqjes, trajtimit deri te shërimi i tyre, me një përkushtim profesional.
Duke u thelluar në lexim, të krijohet përshtypja se t’i je vet mjeku. Thënë shkurt është një libër, që bazuar në thjeshtësinë e shtjellimin të materies, të tërheq të thellohesh në përshkrimet, që ilustrohen edhe me shembu, nga më të ndryshmit. Ky konstatim del nga përshkrimi që iu bëhet sëmundjes dhe zonës së trupit, në të cilën gjendet ato, në faza e moshë të ndryshme, duke mos anashkaluar shkaktarët dhe gjendjen e pacientit me këtë sëmundje. Duke elaboruar në tërësi sëmundjen, me të gjitha indikacionet e saj, në libër sqarohen deri në detaje mënyrat e veprimit deri në fazën e fundit, ndërhyrja kirurgjike, kur veprimet e tjera nuk kanë pasur sukses.
Edhe pse në libër ka shumë terme profesionale në Gjuhën Latine, autori ato do t’i sqarojë deri në atë shkallë, sa për t’i bërë të kuptueshme edhe për lexuesin laik të mjekësisë.
Pos kësaj, nëpërmjet këtij libri, del qartë se bëhet fjalë për njohuri bashkëkohore të kësaj fushe nga kryepersonazhi i librit Dr Luan Mustafa. Këtë e gjen te secili pasus e kapitull, ku zbërthehen fazat e hershme të shfaqjen të shoqëruara me simptomat që i përcjellin hemoroidet, qofshin ato gjakderdhje, dhembje, kruarje e të ngjashme. Në këtë kontekst jepen edhe këshillat për mënyrën e trajtimit me medikamente deri te ndërhyrja kirurgjike.
Mbi të gjitha, në epiqendër të librit është mjeku specialist, dhe këshillat e vendimet e tij, që janë të vetmet për trajtim dhe shërim të sëmundjes. Me këtë rast nuk iu lihet hapsirë veprimeve qofshin ato religjioze apo popullore.
Dr. Sci Luan Mustafa
Autori do të ndalet edhe te faktorët, që ndikojnë në parandalimin e ripërseritjes së sëmundjes, pas shërimit të saj. Aty përmenden shumë elemente, që nga sjellja e pacientit, e deri te aktivitet fizike, siç është ecja,ushqimi i lëngshëm, pemët,…
Në libër zbërthehen fare qartë mënyrat e hershme të shfaqjen së sëmundjes, sikur edhe ato të moshës, qoftë me gjakderdhje, me dhimbje, qoftë edhe pa ato.
Kjo sëmundje që njihet edhe si profesionale, për shkak të qëndrimit të gjatë në karrige, nëpër zyra pranë kompjuterëve, kërkon nevojën e aktiviteteve fizike.
Këtu shpjegohen në hollësi mënyrat e ndërhyrjeve dhe rezultatet, që ka shënuar kryepersonazhi i librit Dr. Luan Mustafa, gjatë përvojës së tij shumëvjeçare si kirurg. Mbi të gjitha duhet theksuar se nga përvoja e gjatë në këtë fushë ka arritur ta krijojë në mënyrë operimi vetjake, pas të cilës pacienti mund të shkojë në shtëpi.
Besoj se kjo është një e arritur që mund të konsiderohet risi në këtë libër dhe metodë e re operimi.
Për të mos lodhur lexuesin me termet shkencore, që ndodhen në libër, mund të konstatojë pa dilema se libri paqaqet edhe si kontribut profesional e shkencor në këtë fushë. Kjo bindje forcohet edhe nga burimet e literatura e përdorur gjatë hartimit të librit si dëshmi e përcjelljes së zhvillimeve shkencore në këtë fushë.
