Nga: Lirim Gashi
___
Mbrëmë mezi e durova disa minuta Vlora Çitakun, teksa ajo e shpalosi tërë repertorin e injorancës së saj të thellë, të verbër, të prapambetur dhe kronike.
Ajo nuk e ka as ndjeshmërinë më të vogël për faktin se përkushtimi i saj ndaj individëve të së kaluarës është në fakt tentim dinak për rikthim tek politka e rrezikshme shtetërore e partisë së saj – e cila kur ishte në pushtet e instaloi në politikën tonë komunale e shtetërore shpirtin e korrupsionit dhe krimit të organizuar, të punësimeve nepotike, të oligarkisë së privilegjuar të importit, si dhe të marrëveshjeve fatale të Brukselit, që e rrezikuan sovranitetin tonë në vend që ta çonin Serbinë përpara drejtësisë ndërkombëtare për gjenocidin ndaj shqiptarëve të Kosovës.
Kombinuar me paaftësinë e saj për ta kuptuar vullnetin e popullit në zgjedhjet parlamentare dhe natyren e ndryshimeve tektonike në politikën globale, bëhet e qartë se kemi të bëjmë me një politikane të konsumuar nga një parti e dështuar, që nuk e di as pse ekziston, e lëre më çfarë duhet të bëjë për të qenë e pranueshme dhe e dobishme për shoqërinë dhe shtetin tonë.
Dëshiroj vetëm t’ia kujtoj Vlora Çitakut disa nga dështimet themelore të partisë së saj kur ishte në pushtet:
1. Politika dhe diplomacia
Vlora Çitaku dhe klani i saj politik mbështetën marrëveshje të dëmshme për Kosovën, si Marrëveshja e Brukselit, e cila legjitimoi strukturat paralele serbe në veri dhe hapi rrugën për krijimin e Asociacionit njëetnik. Në vend që të kërkonin drejtësi për gjenocidin serb në Kosovë, ata e lanë këtë çështje të harrohej në arenën ndërkombëtare dhe e bënë Kosovën viktimë të një loje diplomatike të manipuluar duke e detyruar ta krijojë një Gjykatë Speciale raciste që e devalvon dhe e deformon luftën e drejtë të shqiptarëve për çlirim, liri dhe pavarësi.
2. Arsimi
Qeveritë e mëparshme e degraduan sistemin arsimor duke promovuar diploma të blera dhe plagjiatura akademike. Si rezultat, sot Kosova përballet me papunësi të lartë të të rinjve dhe mungesë të profesionistëve në tregun e punës, sepse shkollat dhe universitetet tona janë të mbushura me profesorë të emëruar politikisht, të paaftë për të nxjerrë gjenerata të kualifikuara.
3. Prodhimi dhe punësimi
Politikat ekonomike të partive të përkrahura nga Çitaku shkatërruan industrinë vendore. Në vend që të investonin në prodhimin vendor, ato favorizuan oligarkët e importit. Sot, Kosova importon pothuajse të gjitha produktet bazë dhe është ekonomikisht e varur nga rajoni, veçanërisht nga Serbia.
4. Ekonomia dhe financat
Borxhi publik u rrit në mënyrë të pakontrolluar për shkak të projekteve të dështuara dhe korrupsionit institucional. Bankat vendore mbajnë normat e kredive shumë të larta për bizneset e vogla, duke e bllokuar zhvillimin e sipërmarrjes private.
5. Shëndetësia
Sistemi shëndetësor u la në mëshirë të fatit. Mjekët dhe infermierët po e braktisin masivisht vendin për të emigruar në BE, për shkak të kushteve të këqija të punës dhe pagave të ulëta. Ndërkohë, qytetarët janë të detyruar të trajtohen jashtë vendit, sepse spitalet publike nuk kanë kapacitet për trajtime serioze.
6. Siguria dhe mbrojtja
Në vend që të ndërtonin një ushtri të fortë dhe të pajisur me armë moderne, partitë e mëparshme toleruan ndikimin serb në sigurinë kombëtare dhe nuk bënë përpjekje serioze për të krijuar një mbrojtje të qëndrueshme. Ndërkohë, Serbia vazhdon të armatoset dhe të kërcënojë stabilitetin rajonal.
7. Kapja e prokurorisë dhe drejtësisë nga PDK dhe LDK
Bëhet fjalë për një proces të gjatë dhe të mirëmenduar, i cili u zhvillua përmes disa mekanizmave kryesorë:
A ) Emërimet politike –
Gjatë dekadave të pushtetit, PDK dhe LDK siguruan që shumica e prokurorëve, gjyqtarëve dhe udhëheqësve të institucioneve kyçe të drejtësisë të ishin individë të afërt me ta ose të kontrolluar përmes ndikimit politik. Kjo bëri që prokuroria të ishte e pafuqishme ndaj korrupsionit të tyre.
B ) Kontrolli përmes KPK-së dhe KGJK-së —
Këshilli Prokurorial dhe Këshilli Gjyqësor i Kosovës, që janë përgjegjës për mbikëqyrjen e prokurorëve dhe gjyqtarëve, u mbushën me njerëz të lidhur me partitë e vjetra. Ata garantuan që të mos kishte hetime serioze ndaj zyrtarëve të korruptuar të PDK-së dhe LDK-së.
C ). Shantazhi dhe presioni ndaj prokurorëve të pavarur —
Çdo prokuror apo gjyqtar që tentonte të hetonte raste të mëdha korruptive, përballej me kërcënime, sabotime ose transferime të detyruara. Rastet e shumta ku hetimet ndaj ish-zyrtarëve të lartë të PDK-LDK-së janë shuar apo janë tërhequr, tregojnë për këtë ndërhyrje sistematike.
D ). Amnistimi i korrupsionit —
Në vend që të pastronin sistemin nga korrupsioni, PDK dhe LDK krijuan mekanizma ligjorë që ndihmonin në mosndëshkimin e korrupsionit të nivelit të lartë, duke manipuluar afatet kohore për hetime dhe duke bllokuar iniciativa për veting serioz.
E ) Përdorimi i prokurorisë kundër opozitës —
Gjatë qeverisjeve të tyre, PDK dhe LDK përdorën sistemin e kapur të drejtësisë për të persekutuar kundërshtarët politikë, ndërsa anashkaluan krimet e tyre. Kjo u pa veçanërisht gjatë hetimeve të njëanshme ndaj aktivistëve të Vetëvendosjes dhe mosndëshkimit të skandaleve të mëdha korruptive.
Në këtë kontekst, përpjekjet e Albin Kurtit dhe qeverisë së tij për të çkapur drejtësinë po hasin në rezistencë të madhe nga këta mekanizma të rrënjosur thellë. Ndaj, vetingu i sistemit të drejtësisë është i domosdoshëm për të rikthyer drejtësinë në duart e qytetarëve dhe për të ndëshkuar ata që e kanë kapur për interesa të tyre.
Përfundimi
Vlora Çitaku dhe soji i saj janë mishërimi i dështimit të politikës së vjetër.
Ata nuk kanë as vizion e as ndjeshmëri për brengat e qytetarëve, por kujdesen vetëm për interesat e tyre tē ngushta dhe për interesat e ngushta të oligarkëve që i mbështesin.
Shqiptarët e Kosovës e kanë kuptuar tashmë këtë lojë të pistë me fatin e tyre, ndaj mbështesin një politikë tjetër – atë që bazohet në sovranitet, zhvillim ekonomik dhe drejtësi sociale.
