Xhevat Syla
*
Në kujtim të Agim Devës, shkrimtarit e poetit tonë të njohur të letërsisë për fëmijë
Agim Deva : 6 prill 1948 – 1 shkurt 2009
U bënë 15 vjet nga shkuarja jote në amshim, Agim i dashur, profesor shembullor, poet tejet prodhimtar e cilësor, studiues i përkushtuar dhe shumë i frytshëm i letërsisë për fëmijë, shkrimtar në ballë të shumë organizimeve që kishin të bënin me letërsinë për fëmijë, mik i dashur dhe i respektuar kudo e me këdo që punove.
U bënë 15 vjet që na mungon shumë, por edhe që mbetesh i pandashëm në aktivitetet tona letrare, para së gjithash në Karvanin e Shkrimtarëve për Fëmijë, të cilin e themelove para 25 vjetësh e që vazhdon të jetojë me emrin tënd si manifestim i rëndësishëm letrar, i përkrahur nga fëmijët, shkollat dhe nga opinioni i gjerë kulturor jo vetëm në Kosovë.
Edhe pas 15 vjetësh dhe gjithmonë ti përmendesh dhe do të kujtohesh me dashuri e respekt nga dashamirësit e librit dhe miqtë e tu të shumtë.
Në këtë përvjetor po të përkujtoj me një poezi që e shkrova ditët e para pas shkuarjes tënde në amshim, i dashur Agim.
____
Xevat Syla, Prishtinë
___
FËMIJËVE UA RUANI FËMIJËRINË
Agim Devës
1.
Mbrëmë bëra një shëtitje vetëm
Dhe vetëm në shtëpi u ktheva.
Ashtu u duka, se prapë kudo
N’shoqëri më ishte Agim Deva!
Po, po, bashkë qemë. Shëtitëm.
Bëmë fjalë edhe për poezi…
– Karvani, tha, ajo valle gëzimi,
Kudo – të mbjellë dashuri!…
2.
Sot prapë kalamendem qytetit,
Me barrën e ditës në shpinë…
N’çdo hap sikur dëgjoj Agimin:
– Fëmijëve ua ruani fëmijërinë!
Sakaq nga ëndrra më nxjerr
Fotografi e mikut në mur;
Më mbyt zbrazëtia në rrugë,
Ngrohtësia që s’kthehet kurrë…
3.
Po ç‘është ajo që më mban,
E më ysht drejt agimit të ri?
Janë ata që i dua e më duan,
Është kujtimi i mirë për ty.
Në këtë botë jemi sa jemi,
Kush tjetër jetë ka gjetë?
Sa bëmë, deshëm, kujtohemi…
Aq rron e jona – j e t ë.
***
***
Shkurt, 2009
Agim Deva
Shkrimtari Agim Deva, duke biseduar me një fëmijë, dikur …
